(Díli) Mudansa–Arce Bispo Metropolitano Díli Dom Virgilio Do Carmo Da Silva, SDB Informa, Papa nia Visita Apostólika ne’ebé sei akontese iha loron 9 to’o 11 fulan Setembru 2024, ne’e sei sai eventu ístoriku ida ba povu Timor, ne’ebé hein kleur ona prezensa Santu Padre Francisco nian iha rai doben Timor, rai ida ne’ebé nia povu moris simples.
Arcebispo Metropolita de Díli, Pró-Presidente da Conferência Episcopal Timorense no Coordenador Geral husi ekipa Igreja nian ba Santu Padre nia visita mai Timor-Leste, Sua Eminência Dom Virgilio do Carmo da Silva, hamutuk ho reprezentante Sua Santidade nian iha Timor-Leste, Revmo. Monsenhor Marco Sprizzi, nakonu ho fuan ksolok no ónra bo’ot hakarak fó sai ofisialmente data husi Sua Santidade nia Visita Apostólika mai iha Timor-Leste, ne’ebé Santa Sé hato’o mai liu husi Nunciatura Apostólika, no vizita Amu Papa Francisco nia mai Visita Apostólika iha Timor sei hala’o iha loron 9 to’o 11 Setembru 2024.
“Papa nia Visita Apostólika ida ne’e sei sai Eventu ístoriku ida ba povo Timor, ne’ebé hein kleur ona presensa Santu Padre Francisco nian iha rai doben Timor, rai ida ne’ebé nia povo moris simples sira hatene moris sira nia originalidade fiar nian iha Cristo Jesus, Visita oficial ne’e, planeia antes ona iha tinan 2020, maibe tamba kausa husi Pandemia Covid-19 nian, mak visita ne’e la consegue realiza, no ohin, ita hotu nakonu ho sentimento ksolok nian, agradese ba Sua Santidade nia konfirmasaun atu mai Timor, no atu hatudu sinal gratidaun no domin,” Dehan Arce Bispo Metropolitano Díli Dom Virgilio Do Carmo Da Silva, SDB ba jornalista sira iha Câmara Eclesiástica Arquidiocese Metropolitana Díli, 12/04/2024
Arce Bispo hatete tan, ba Santu Padre nia ekipa preparasaun husi parte Igreija nian servisu maka’as hela, hamutuk ho Nunciatura Apostólika, atu prosesu preparasaun tomak hodi simu Sucessor São Pedro no Pastor Universal Kreda nian bele la’o ho diak.
“Ita agradese mós ba Estado Timor nian, ba Sr. Presidente da República, ba Sr. Primeiro Ministro, no ba Ekipa tomak husi parte Governo nian ba preparasaun Santu Padre nia visita, liu husi kolaborasaun ne’ebé di’ak tebes no esforço hotu iha preparasaun organizativa no logistika, atu fasilita sarani tomak bele partisipa, no mai hamutuk ho Santu Padre, tan ba sira mak Santu Padre mai, atu hametin liu tan sira nia fiar no domin ba Cristo nia Kreda iha Timor-Leste,” Nia Afirma
Arce Bispo Metropolitano Díli Dom Virgilio Do Carmo Da Silva, SDB Lori konferênsia Episcopal Timorense no Nunciatura Apostólika nia naran, hakarak apela ba maun- alin no bin-feton Timoroan hotu, atu kolabora no servisu hamutuk iha tempo preparasaun nian ida ne’e, no liu-liu buka atu prepara an ho orasaun hodi simu Santu Padre, atu nune’e liu husi vizita ida ne’e sei sai momento ida ne’ebé haburas liu tan iha participasaun ba konstrusaun komunidade Kreda no nasaun nia.
Jornalista : Gaudencia Belo
Editor : Veraka
