(Dili) Media Mudansa – Profesóres kontradu 2023, kontinua halibur malu halo komunikadu impresa iha Jardin 5 de maio, hodi ejize sira nia direitu ba ministeriu edukasaun oinsa bele solusiona problema ne’ebé dadaun ne’e sira enfrenta.
Portavoz Agostinho Pinto informa, nia parte husu ba Ministra Edukasaun atu responsavel ba ninia asaun, bainhira la presta vontade no responsablidade atu rezolve problema, profesores hira ne’e sei halo, Petisaun, Asaun Marsa Pasifiku, no mos sei halo Manifestasaun pasifiku.
“Ministra Edukasaun no Sek. Estadu Ensinu Secundario Jéral no Teknika Vokasionál hapara tiha ami profesór sira nia kontratu sem karta notifikasaun ruma maibé bandu ona ami profesórs sira labele hamrik tan iha aulas hodi hanorin no eduka ami nia oan doben estudantes sira,” dehan Portavoz Agostinho Pinto liu husi komunikadu impensa iha Jardin 5 de maiu Kolmera Dili.
Nia akresenta, profesóres kontratadu sira triste, tuir lolos iha tempu inisiu aprendizajen hanesan ne’e, profesores hamutuk ho estudantes sira, aprende hamutuk iha aulas laran, maibé hanesan públiku hatene situasaun agora ne’eebe sira hasoru.
“Tanba ne’e hakarak apela ba profesóres kontratadus 2023 iha teritorio Timor laran tomak atu hotu-hotu iha ona Dili antes 22 Janeiru 2024 nune’e hahu ita nia asaun pasifiku hodi defende ita nia direitu ne’ebé hatur ona iha dekretu lei No.31/2023, 31 de Maio no dekretu lei sira seluk nebe regula regra administrasun funsaun públiku nian,” Agostinho afirma.
Iha ne’ebé, profesores kontratadu hira ne’e hatoo mos lamentasaun ba asaun Ministra edukasaun nia ne’ebé hatudu ba manorin nain sira, mak hanesan,
- Ami profesóress kontratadu iha tinan 2023 hamutuk 1.715, lamenta atitude Exelencia Ensinu sekundariu jéral no nain rua sra. Ministra Edukasaun no Sek.Estadu asunto Tékniku Vokasionál la respeita valores de boa governasaun no la asegura direitu no intreses legitimus sidadaun sira nian.
- Sra.Ministra Edukasaun no Sek.Estadu asunto Ensino secundario jéral no Tékniku Vokasional foti desizaun ne’ebé la hare ba vantajen no Desvantajen kuandu hapara ami profesór kontratadus sira, entaun ninia implikasaun maka públiku bele hare. Ohin loron eskola balu taka ona tanba profesór la iha, eskola balu menus profesór.
Exelensia nain rua uza de’it mak sira nia arogancia, hakarak maka hapara totál profesór kontratadu tinan 2023 nian no la konsidera ami profesór sira nia sakrifisiu no dedikasaun servisu voluntariu tinan 10 liu ba molok hetan rekonesimentu husi mandatu governu da-8 liu ba.
- Sra. Ministra Edukasaun no Sek.Estadu asunto Ensino sekundariu jéral no Tékniku vokasionál nia atetude la hatudu vontande nudar governante ida ne’ebé hetan komfiansa husi Na’i Primeru Ministru, hodi tau intrese nasionál a’s liu intresse privadu maibé hakarak kria de’it problema no halo de’it diskriminasaun ba ami profesór sira.
Ho intesaun atu baralha de’it Sistema edukasaun iha rai lulik ida ne’e hodi nune’e povo aileba nia oan sira labele assesu edukasaun ida ho diak no kualidade. Realidade mak povo nia oan sira sofre dadauk ona tamba menus profesór.
- Sra. Ministra Edukasaun no Sek.Estadu asunto Ensino secundario jéral no Tékniku Vokasional labele haluha,profesór kontratadus sira ne’ebé agora dadaun ami halibur an iha ne’e mesak nudar mate restu. sobrevivente, veteranus, martires no povu ki’ik nia oan sira. Tanba ne’e ami iha direitu tomak atu servi rai lulik ida ne’e liu husi vokasaun no profisaun ne’ebé ami iha.
- Sra. Ministra Edukasaun no Sek.Estadu asunto Ensino secundario jéral no Tékniku vokasionál keta haluha ukun-an ida ne’e liu husi ema barak nia terus no sofrimentu oi-oin, balu mate tanba ema oho, mate tanba hamlaha no balu lakon to,o ohin loron la hetan.
Tanba ne’e bainhira hetan oportunidade atu servi povu no rai ida ne’e karik atu servi ho fuan no labele ukun hamosu de’it problema no diskriminasaun nune’e bele valoriza no fo ongra ba heroi sira tanba ukun-an ida ne’e nia finalidade maka povu tenki moris diak, povu nia oan sira tenki asesu edukasaun.
Nune’e mos profesores hirak ne’e hato’o sira nia Ezijensia ba Ministra Edukasaun mak hanesan,
- Husu ba Sra. Ministra Edukasaun no Sek.Estadu asunto Ensino secundario jéral no Tékniku Vokasional atu executa ordem Nai Primeru Ministru nian atu resolve problemas profesór kontratadu 2023 nian laos atu hapara.
- Husu Sra. Ministra Edukasaun no Sek.Estadu asunto Ensino Secundario Jéral no TekVok atu resolve estatutu profesóres kontratadu tinan 2023 nian tuir Dekretu Lei No.31/2023, 31 de Maio konaba estatutu kareira dos profesóres ne’ebé previstu ona iha artigo 11.
- Husu Sra. Ministra Edukasaun no Sek.Estadu asunto Ensino Sekundario Jéral no Tékniku Vokasional atu resolve uluk problemas profesóres kontratadus 2023, Reklamantes no voluntares molok loke teste bolsa kandidatu ba públiku.
Jornalista : Jaime Ornai
Editór : Orlando Magno
