(Dili) Mudansa – Sekretáriu Estadu Komunikasaun Sosiál (SEKomS) serbisu hamutuk ho Governu Australia liu husi asosiasaun Timor-Leste Australia Alumni Association (TL3A) hala’o workshop ba ofisiál média na’in-12 resin, kona-ba utulizasaun rede sosiál Facebook, ho tema “Hakerek Konteúdu no Jestaun Facebook ba Governu nia Ofisiál Média Sira” iha Sala PCM, Palásiu Governu, Kinta, 18/01/2024.
Tuir Sekretáriu Estadu Komunikasaun Sosiál (SEKomS), Expedito Dias Ximenes hatete, IX Governu konstitusionál sente katak, iha tinan 5 nia laran informasaun ne’e importante teb-tebes, tanba informasaun importante teb-tebes no ema hotu-hotu akompaña iha mundu oras ne’e daudaun, avansu dijitál, ema moris iha era dijitál, maka ema sira ne’ebé hola parte, kaer no maneja informasaun iha média, presiza iha formasaun.
“Tanba ne’e maka bainhira parte TL3A mai ko’alia ho SEKomS kona-ba oinsá atu halo ou hamutuk hodi fó formasaun ida ba kolega sira ne’ebé hamahan aan iha média ofisiál, dala barak média ofisiál ne’e ema hanoin katak, staf ida ne’ebé la iha importánsia, maibé ba IX Governu konstitusionál, média ofisiál ne’e importante teb-tebes iha liña Ministerial sira,” SEKomS Expedito Dias Ximenes kasu lia hirak ne’e liu husi nia diskursu iha serimónia Workshop refere.
Expedito Dias Ximenes aumenta, formasaun ida ne’ebé fó ba sira atu jere pájina Facebook iha liña Ministerial sira, ne’ebé ho naran di’ak liu maka média ofisiál, média ne’e katak, ema hotu uza meus komunikasaun ninian, ofisiál ne’e katak, nia maka responsabilidade iha liña Ministerial ne’ebé nia serbisu ba.
Iha VIII Governu no Governu sira anterior, dala barak média ofisiál ne’e bele dehan hanesan, apoiamente polítika, ne’ebé ida bainhira Governu ida hotu ne’e hotu ona, maibé IX Governu sei la halo hanesan, IX Governu sente katak Média Ofisiál tenke ema ne’ebé permanente kontinua saida maka Governu ida la’o, sei Governu ida tuir fali mai, nia nafatin habelar informasaun ne’ebé iha liña Ministerial nia laran.
“Ne’e maka formasaun ne’ebé IX Governu konstitusionál halo liu husi SEKomS, halo dala barak ona ba média ofisiál sira, la’ós de’it iha nivel nasionál maibé mós halo liña Ministerial liu-liu iha Munisípiu sira hanesan CEFTEC, Sentru Formasaun Tekníku Komunikasaun IX Governu nian no ohin ita hahú ho formasaun ne’ebé iha impaktu ne’ebé bo’ot,” SEKomS Expedito afirma.
Expedito esplika, impaktu bo’ot tanba sá, ema hotu-hotu akompaña ho avansu teknólojia ho erra dijitál ne’e, la’ós ona média konvensionais maka sai produtor ba informasaun, daudaun ne’e ema ida-idak la’ós ona sai konsumidor ba informasaun maibé sira mós produtor ba informasaun.
Tanba ne’e oinsá hotu-hotu atu jere Facebook ou média ne’ebé ema ne’ebé kaer iha liña Ministerial sira ne’e, presiza iha formasaun, ho ida ne’e maka IX Governu agradese Agradese ba Embaixada Austrália ho mós antigus alunu TL3A ne’ebé iha hanoin di’ak oinsá atu uza Facebook ne’ebé iha liña Ministerial nia laran ho didi’ak.
“Ha’u husu ba kolega média ofisiál sira husi Minísteriu sira ne’ebé iha, aproveita workshop ida ne’e hodi bele komprende liu tan, oinsá ita atu Facebook, uza atu halo saida, objetivu saida, tanba iha formasaun ne’e maka formadór sira sei fó hatene ba ita hotu,” SEKomS Expedito argumenta.
Iha fatin hanesan First Secretary Australia Embassy Public Diplomacy, Peter Simojoki subliña, importante teb-tebes bele partisipa iha ne’e, kona-ba relasaun Timor-Leste ho Austrália ne’e metin tebes entre ema ho ema, ohin loron ne’e importante teb-tebes ne’ebé haree kolega sira ne’ebé serbisu iha área komunikasaun partisipa iha serimónia ida ne’e.
“Ha’u iha ne’e mais ou menus fulan neen (6) ho balu, ha’u nota katak, iha Timor-Leste instituisaun governu nian barak maka utiliza sosiál média liu-liu Facebook atu públika informasaun sira ne’ebé relevante no importante, tanba ne’e ha’u espera liu husi formasaun ida ne’e, Austrália bele aprende buat foun ruma,” Peter Simojoki akresenta.
Entretantu Board Member Of TL3A, Vaneza Ferreira informa, sente orgullu nu’udar reprezenta Konsellu Asosiasaun Alumni Bolseiru Bolsa Estudu Australia (TL3A) sira hodi hamutuk ho média ofisias sira iha ne’e ohin loron, iha semináriu importante ida ne’e kona-ba ho tema “Hakerek Konteúdu no Jestaun Facebook ba Governu nia Ofisiál Média Sira” no fó tempu ba Alumni TL3A hahú ho rekoñese kontinuasaun apoia husi Governu Austrália ne’ebé fornese ona no sei nafatin kontinua hodi fornese nafatin oportunidade ba Timoroan sira, tantu boiseira no mós alumni sira.
“Dadeer ida ne’e, ita mai hamutuk iha ne’e hodi simu rezultadu investimentu entre Governu Timor-Leste no Austrália hodi promove dezenvolvimentu estadu entre alumni no komunidade sira liu husi Asosiasaun Alumni Bolseira Bolsa Estudu Australia ou TL3A nia atividade sira, tantu atividade setorál no mós atividade ho fundu kiik sira. Ida ne’e la’ós primeira no ikus liu mak Embaixada Asutralia fornese ona apoia ba alumni sira, nia faktu mak TL3A hala’o atividade iha área média no komunikasaun nian no sei kontinua hala’o atividade hanesan ne’e iha futuru,” Vaneza Ferreira dehan.
Lori sira seluk nia naran mak aprezenta iha ne’e, ohin loron nu’udar individu ida entre 359 alumni husi Bolsa Estudu Austrália, inklui belun defisiente sira hamutuk mane na’in-5 no feto na’in-1
“Atividade ida ne’e TL3A inisia programa Small Grant kona-ba Hakerek Konteúdu no Jestaun Facebook ba Governu nia Ofisiál Média Sira no sai ona hanesan ezemplu ne’ebé di’ak ba kontribui hikas fali ba Timor-Leste nia dezenvolvimentu iha área komunikasaun, nune’e ohin loron partisipante kuaze na’in-12 ho sira seluk tan ne’ebé iha área komunilkasaun nian,” nia relata.
Lori TL3A nia naran, hakarak hato’o agradesimentu ne’ebé bo’ot teb-tebes ba SEKomS ne’ebé fó ona espasu ba Sr. Isidoro hodi koordena no fornese transferénsia koñesimentu ba belun sira iha Governu iha área komunilkasaun no mós agradese ba inisiador programa ne’ebé fó ona tempu hodi realiza atividade ohin loron.
Jornalista: Mariano Do Santos Abi
Editor: Felisberto F. Da Costa
