Planu 22 Janeiru Greve Hasoru ME, Profesores Kontratadu Prontu Mate

banner 120x600

(Dili) Média Mudansa – Profesóres kontradu 2023, halibur malu hodi ejize sira nia direitu ba ministeriu edukasaun oinsa bele solusiona problema ne’ebé dadaun ne’e sira enfrenta, tanba sira konsidera Ministra Edukasaun hamosu diskriminasaun tanba hapara sira nia kontratu sem notifikasaun.

Iha ne’ebé, profesóres kontratadus 2023 iha teritorio Timor laran tomak atu hotu-hotu iha ona Dili antes 22 Janeiru 2024 atu halo asaun pasifiku hodi defende sira nia direitu ne’ebé hatur ona iha dekretu lei No.31/2023, 31 de Maio no dekretu lei sira seluk nebe regula regra administrasun funsaun públiku.

Profesor Candido das Costa Gomes informa, nuudar manorin durante oferese servisu voluntariu liu on tinan 10, tan nee labele halo violasaun direitu no diskriminasaun ba professor sira, maibé, estatutu klaru tiha ona nu’udar professor grau D, iha ajenti Administrasaun publika hala’o knar iha eskola.

“Bainhira Ministra Edukasaun la responde Ezijiensia ka la toma responsabilidade mak, ami nia posisaun sei halo asaun greve no prontu mate katak funu Sosial sei mosu, ami manorin nain hatene tiha ona saida mak akontese oin mai nee ME implementa funu Sosial iha rai ida ne’e,” dehan Profesor Candido ba jornalista iha jardin 5 de Maiu Dili, 18/01/2023.

Candido relata, durante nee manorin sira sakrifika an hodi hanorin estudante sira la haree ba kor no politika tanba nee nia husu MInistra Edukasaun Atu tetu didiak antes foti desizaun.

“Ami la hanorin kor politika iha eskola, maibé ami hanorin edukasaun ba ita nia oan doben sira, kuitadu Ministra iha fuan ka la’e? Sei iha fuan investe ita nia kakutak ne’ebé matenek ba rai ida ne’e no labele diskriminasaun ba ami.” Nia afirma.

Iha fatin hanesan, Professor Elisiaro Soares Barreto argumenta, professores husi munisipiu Bobonaru 2019 nian bainhira atu halo asina kontratu halai mai Dili mak asina no la fó sai Jornál Republika, ida ne’e validu. tanba sa profesores tinan 2023 nian, prosesu ne’ebé naruk liu husi indentifikasaun,  priense vagatura, reniaun Konsellu Ministru, ne’ebé fó sai tiha ona jornál Republika.

“Ha’u konsidera impaktu bo’ot ba prosesu apredizajen liu-liu dezenvolve pensamentu labarik sira nian, tanba husi loron ba loron, oras ba oras  siensia nafatin dezenvolve pensamentu kontinua to’o mate,  tanba ne’e labele halimar dezenvolvimentu sosiedade,” nia dehan.

Tuir dadus ne’ebé Média Mudansa asesu, Profesores kontratadu 2023 hamutuk 1.715, tuir planu bainhira ministra la responsabiliza ba asuntu nee maka, Profesores Kontratadu 2023 sei halo asaun pasifiku iha 22 janeiru tinan nee hasoru Ministra Edukasaun sira iha Ministeriu Edukasaun.

Jornalista             : Jaime Ornai

Editór                    : Orlando Magno

banner 325x300