(Díli) Mudansa- Relasiona ho implementasaun dekretu lei númeru 33/2008, koletór lixu Abilio Soares preokupa ho hahalok Xineza sira ne’ebé loke loja iha fatin-fatin tanbá seidauk hahoris konsiensia maduru bainhira soe fó’er iha lixu fatin.
Soe fóer arbiru sai ona toman ida ne’ebé Timor-oan maioria difisíl atu husik maske governu estabele ona lei hodi kombate ida ne’e. Tuir dekretu lei 33/2008, iha artigu 9 (sia) ne’ebé ko’alia kona ba soe lixu tuir nia oras, hahu husi tuku 18:00 to’o 06:00 dadersan maibé ninia implementasaun sei kontrariu ho lei refere.
“loja Xina la iha konsiensia soe fóer tanbá lixu fatin ne’ebé governu prepara maibé la tau iha laran, soe namkari no latuir regras governu fó sai,” dehan koletór lixu Abilio Soares ba jornalista Media Mudansa, Kuarta, 11/01/2024
Nia sujere, ba komunidade sira ne’ebé hela iha bairu-bairu no liu-liu ba loja xina sira atu hakmaan sira nia servisu liuhosi soe foer iha nia fatin no soe tuir oras. “ami triste bainhira foer namkari iha liur, ami presija dasa tan tanba favor bo’ot ida tanbá fóer barak sira mak soe, labele halo koletór lixu sira triste tanba fóer ne’ebé namkari konsidera netik ami nia servisu ne’ebé rahut imi nia fóer sira,”.
Iha sorin seluk, jornalista média Mudansa ba halo konfirmasaun iha terenu, loja 88 besik postu transitu nian ne’ebé foer barak tebes, fakar namkare iha baleta laran no naklekar iha totoar leten, traballadora loja Xineza Mau 88, Zelia Madalena Periera,
“Sim Ami mak soe foer iha lixu fatin, hanesan dos mamuk no sasan sira ne’ebé la uza ona, ami soe foer iha oras 17:00 bazeia ba ami oras servisu remata, patraun haruka ami soe foer mak ami fila ba uma.” Dehan Zelia Madalena Periera iha nia ka’ar fatin loja Mua 88.
Hafoin ne’e, Husi Loja Yong Luxin, traballadora ho naran Consoela Eugenia subliña, klaru ami soe foer duni iha fatin lixu, maibé agora soe foer iha tempu kalan tuku 20:00, tanba sira hetan xamada atesaun husi Meu Ambiente iha fulan oitumbru 2023.
Maibé sira nia sasan sempre segel ka kesi metin mak soe hamutuk iha fatin lixeiru, sira deskonfia ema balun ne’ebé sobu sasan aat iha lixeiru no ikus soe ba bale kuak tanba lixu besik liu iha baleta, tipu sasan aat sira ne’ebé soe mak hanesan Dos mamuk, sapatu sira ne’ebé at, fesu, sasan labarik nian no sasan sira iha loja laran ne’ebé at no la uza.
“La’os ami mesak de’it mak soe foer maibé ita nia komunidade sira soe hotu foer iha fatin ne’e, tanba de’it ami besik liu lixu no irigasaun mota mak dun matak ami soe sasan at la tuir regra, maibé lae, ami nia sasan sira sempre kesi metin mak lori ba tau iha lixu fatin.” Dehan nia
Xefe Departamentu Saneamentu Domingos dos S. Soriano iha nia kna’ar fatin, loron kuarta, hatete komunidade sira hela iha fóho leten menus konsiensia soe fóer, wainhira tempu udan bo’ot dalaruma bele hetan inudasaun lixu iha sidade laran bele akontese.
“Durante asesu ba fóti lixu, iha fóho hun no rai hun ami la bele asesu tanbá dalan la tama to’o iha ne’ebá, exemplu mak Matadoru fóho lolon sira ne’e komunidade hela ba sira mós prodúz fóer barak los, pois sira soe fóer de’it iha bee dalan, wainhira udan bee lori kona mota entaun ba tasi mak la kona mota mak mósu naklekar iha rai tetuk lixu makas tebes konsidera inudasaun lixu.”
Parte saneamentu munisípiu Díli ekipa rua mak hanesan ekipa kontratadu no ekipa permanente, iha ekipa kontradu agora dadaun funsiona hodi ra’ut fóer iha fatin lixeiru ne’ebé governu prepara iha sidade laran.
Jornalista :Jaime Ornai
Editór : Felisberto F. Da Costa
