(Dili) Mudansa – Sekretáriu Estadu Florestas (SEF), Fernandino Vieira da Costa hatete, atividade ohin ne’e hanesan workshop ligadu ho investimentu Forest and Landscape Restoration (FLR) iha Timor- Leste, involve mós parseiru dezenvolvimentu sira interligadu.
“Agora diskusaun kona-ba konsep, depois maka sei lori ba iha diskusaun ou proposta iha nivel aas liu hodi bele deside kona-ba proposta ida ne’e, liu-liu programa Reflorestasaun no Agroflorestas ne’ebé tuir planu sei implementa iha Timor-Leste,” SEF, Fernandino Vieira da Costa dehan ba Jornalista sira hafoin partisipa workshop iha City8, Manleuana, Segunda 04/12/2023.
Nia argumenta, konsep tenke la’o ho polítika IX Governo Konstituisionál nian ne’ebé agora la’o dadaun, problema ne’ebé iha Timor maka komunidade barak moris dependénsia ba ai-laran ida ne’e maka sai problema boot iha Timor.
Ho ida ne’e ajénsia no parseiru dezenvolvimentu liuliu doadores sira ne’ebé hakarak mai serbisu iha Timor-Leste, tenke aliña ho kondisaun Timor nian ne’ebé maka iha.
Enkuantu, iha enkontru Konsellu Ministru (KM), Primeiru Ministru (PM), Kay Rala Xanana Gusmão orienta ba membru Governu hotu-hotu atensaun no kontrola serbisu ajénsia sira ne’ebé serbisu iha Timor-Leste katak, serbisu saida mak ajénsia halo iha Timor fó benefísiu saida ba povu no nasaun bele hetan.
“Ita-nia degradasaun ne’e tin-tinan sempre akontese 1.7% dadus ne’ebé mai husi Jepan International Cooperation Agency (JICA) hahú husi 2013 dadus ne’e maka agora la’o nafatin, ne’ebé ita hotu iha responsabilidade atu hare hamutuk, nune’e bele dezenvolve di’ak liu tan,” Afirma Fernandino.
Nia haktuir, Timor-leste iha mota degragada hamutuk 10 ne’ebé liga ho área fronteira Oe-cuse ho Bobonaro fronteira entre Indonezia, área sira ne’e kritika tebe-tebes, tanba ne’e mak hotu-hotu presiza dezenvolve ho di’ak, liga ho konsep note bele enkaisa rekomendasaun ho ideia ruma husi parseiru dezenvolvimentu sira.
“Ne’e importante ba ita hodi halo konsep note ne’e, sai kompletu liu tan atu nune’e ita-nia doadores sira bele apoiu no suporta ita,” nia hakotu.
Jornalista : Mariano Do Santos Abi
Editór : Orlando Magno
