(Dili) Media Mudansa – Jornalista Media Mudansa (MD), Mariano do Santos Aby sente orgullu bainhira hetan terseiru lugár iha kompetisaun (Jornalista Hakerek) ne’ebé organiza husi Telkomcel hodi komemora aniversáriu Telkomcel ba dala XI ho tema “Inovasaun Telkomcel Iha Timor-Leste.”
Iha ne’ebé, Rezultadu kompetisaun ne’e fó sai bainhira Telkomcel realiza serimonia Telkomcel Annual International Summit (TAIS) iha Sektor Teknolozia Telekomunikasaun Digital iha Salaun Multi Uso GMN Bebora Dili, kinta 30/11/2023.
Jornalista Media Mudansa Mariano do Santos Aby informa, nia parte la espera atu hetan terseiru lugár iha kompetisaun refere tanba primeira vés nia tuir kompetisaun hanesan ne’e.
“Antes rona rezultadu husi kompetisaun ne’e ha’u rasik la du’un fiar an atu hetan terseiru lugár iha kompetisaun ne’e, maibé grasa maromak nian ha’u bele hetan terseiru lugár husi produtu ne’ebé ha’u hakerek hodi tuir kompetisaun ne’e,” dehan Jornalista MD Mariano Aby ba Media Mudansa hafoin simu prémiu husi Telkomcel iha Salaun Multi uso GMN, Bebora Dili, Kinta 30/11/2023.
Nia haktuir, iha kompetisaun ne’e primeiru lugár okupa husi Jornalista Suara Timor Lorosa’e (STL), Emerensiana Pinto, Segundu lugár Jornalista Husi Dili Post Lucia Ximenes no mós terseiru lugár maka Jornalista Mariano do Santos Aby husi Media Mudansa.
“Premiu ne’ebé ohin ami hetan husi Telkomcel maka, primeiru lugár hetan osan $.1.000.00 no sertifikadu apresiasaun, segundu lugár $.500.00 ho Sertifikadu ida no mós terseiru lugár hetan $.200.00 ho sertifikadu,” nia esplika.
Iha intervista ikus Mariano hatete, programa Telkomcel ne’ebé loke oportunidade ba jornalista sira liu husi kompetisaun Jornalista Hakerek, ida ne’e nia sente di’ak, espera katak Telkomcel bele kontinua programa nee ba oin.
Jornalista : Ekipa Média Mudansa
Editór : Orlando Magno
