(Dili) Mudansa – FOKUPERS realiza atividade média brifing ba jornalista sira kona ba Orsamentu Sensível Jeneru (OSJ) 2024 ne’ebé sensivel no responsivu ba jéneru no inkluzaun presiza tau iha prátika aloka, justu no razoavel hodi responde ba feto no vítima sira nia kondisaun
Objetivu husi atividade ida ne’e Fokupers hakarak jornalista sira iha koñesimentu kona ba lala’ok Orsamentu Sensivel Jéneru (OSJ) ne’ebé benefísiu ba feto no labarik feto sira husi alokasaun (OSJ) 2024 ne’ebé oras ne’e iha hela faze diskusaun iha parlamentu nasionál.
“Atividade ohin hanesan parte ida atu fahe informasaun ka ita hanaran média brifing ba jornalista sira atu bele hatene no iha koñesimentu kona OSJ husi Orsamentu Jeral Estadu ne’ebé sei mai iha tinan 2024, responde estadu nia komprimisiu ba asuntu igualdade jéneru,”dehan Diretora FOKUPERS Maria Fatima ba jornalista iha Salaun Fokupers Farol segunda 11/12/2023
Diretóra Maria haktuir, kona-ba asuntu ne’e nia hakarak atu lori vítima nia lian ba iha deputadu sira, hodi dehan deputadu sira se la iha posibilidade atu halo vítima ho ema kiak sira kontente labele lori polítika ka lei hodi halo povu laran kanek no matan been suli liu tan.
“Iha tinan kotuk konsege hetan dolares milloens rua ne’ebé aloka ba instituisaun solidariedade sosiál maibé ba tinan ida ne’e infelizmente orsamentu tun fila fali ba 1.4 milloens ne’ebé sei fahe ba instituisaun 37 iha territóriu Timor laran tomak,” katak Maria
Nia hatutan, se governu fahe didi’ak orsamentu ida ne’e kada instituisaun bele hetan de’it 30 míl, tanba instituisaun ne’ebé servisu ho asuntu sosiál hamutuk 37,”.
Nia akresenta ,hakarak fila fali ba prezidente ninian komprimidu katak presiza atu hasa’e nutrisaun iha rai laran maibé to,o agora vítima sira barak mak seidauk hetan nutrisaun ne’ebé mak di’ak ba vítima sira iha uma mahon kuaze nutrisaun ne’ebé mak menus husi estandar
“Presiza atu hasa’e di’ak liu tan nutrisaun ba vítima sira maibé ha’u hanoin alokasaun ba orsamentu dala ruma prejudika ba atendimentu instituisaun solidariedade sosiál nian, liga kedas ba kestaun justisa nia alokasaun ba orsamentu estadu bele prevee de’it ba vítima na’in 10 to’o 15 iha uma mahon no mós ba instituisaun solidariedade sosiál,” Maria relata.
Nia akresenta instituisaun solidariedade sira nian prestasaun servisu tuir lolos fó atendimentu ba iha vítima no mós ba maluk defisiente sira maibé atu halo proposta na’in ulun sira mós presiza atu haree ba kestaun espesífiku sira.
“Liga ho kestaun legál dala ruma vítima sira mós mai ho nia kazu 2 ou 3 ba leten depois kazu ida de’it bele lori tempu naruk dala ruma tinan 1 ka 2 ,maibé realidade atende vítima ne’ebé 50 dala ruma to’o mós atus ida orsamentu la prevee ba iha ne’ebá,”Maria Hakotu.
Jornalista :Domingas Viana
Editor : Orlando Magno
