(Dili) Mudansa – Prezidente Alumni Parlamentu Foinsa’e Timor Leste (APFTL) Jaulino Gomes da Silva informa, Joven mak futuru nasaun nian tanba ne’e hahú agora iha responsabilidade boot atu kria kondisoens ne’ebé dignu hodi fó espasu ba foin-sa’e sira sai joven ne’ebé saudavel no krítiku.
Prezidente APFTL Jaulino Gomes da Silva fó sai argumentu ne’e liu husi ninia diskursu hafoin fó pose ba membru APFTL na’in 142 iha salaun GMN Multi Uso Bebora Dili, tersa 12/12/2023.
“Ema hotu sempre dehan foin-sa’e mak futuru nasaun nian tenke kria kondisaun di’ak ba joven sira, tanba espasu Parlamentu Foinsae Akomoda de’it ho númeru ki’ik maibé hakarak hamutuk ho parseiru dezenvolvimentu sira hateke ba parlamentu foin-sa’e atu prepara joven sira nia futuru,” Jaulino relata.
Nia haktuir, polítika sira no ema hotu dehan joven mak futuru nasaun nian maibé iha tempu ukun an sosiedade sira hanoin ne’ebé negativu ba foin-sa’e sira entaun foin-sa’e sira lakon konfiansa no la fiar an hodi hatete sai sira nia matenek talentu ne’ebé mak iha hodi hatudu ba iha públiku
“Lakohi fó kondisoens di’ak ba joven sira maski ita sempre dehan joven mak futuru nasaun nian bainhira kontinua prega imajen ne’e ba joven sira ho hanoin negativu entaun sira la fiar an no la konsege hatete sai matenek, talentu, no sira nia inovasaun ne’ebé iha,”katak Jaulino
Iha fatin hanesan Prezidente Conselho Nasional Juventude Timor Leste (CNJTL) Maria Dadi Soares Magno argumenta, Posse ba membru APFTL ba períodu da lima iha mandatu tinan 3 la’os oportunidade atu aprende de’it kona ba prátika demokrasia, síviku maibé atu sai modelu ne’ebé di’ak ba foin-sa’e sira seluk.
“Oinsa imi sai modelu no sai joven ne’ebé diferensiál ho joven sira seluk, enkoraja maluk joven sira iha APFTL no onra papél foin-sa’e importante iha família, sosiedade, uma kreda no iha nasaun ida ne’e imi mós sai hanesan Centro ba maluk foin-sa’e sira seluk kona ba direitu devér no Liberdade,” Dady deklara.
Nia haktuir, Nuudar tenke aprende atu hatene kle’an liu tan kona ba papél konstituisaun tanba Parlamentu foin-sa’e sai lian ba lian-laek sira liuliu lian ba foin-sa’e sira ka a vós da Juventude.
Iha ne’ebé, Alumni Parlamentu Foinsa’e Timor Leste (APFTL) realiza serimónia tomada de pose ba membru foun na’in 142 kompostu husi feto 71 ,no mane 71 inklui defisiénsia fíziku na’in 2 ba períodu 2024 to’o 2026 iha Salaun Multifunsaun Bebora Dili.
Jornalista : Domingas Viana
Edtór : Orlando Magno
