(Dili) Mudansa – Koordenadór Centro de Formação Técnica em Comunicação (CEFTEC) Julio Lopes informa, iha tinan 2023, CEFTEC atribui sertifikadu ba formandu husi nivel munisipál hamutuk (355) kompostu husi feto 182 no mane 173.
CEFTEC nu’udar fornesedór formasaun profisionál Estadu nian ne’ebé tutela iha Secretaria de Estado da Comunicação Social (SECOMS), iha Ministério da Presidência do Conselho de Ministros (MPCM) ho nia knaar prinsipál fó formasaun ba profisionál sira iha área komunikasaun sosiál.
“Iha tinan 2023, CEFTEC sei atribui sertifikadu ba formandu husi nivel no munisipál hamutuk 355, kompostu husi Feto hamutuk na’in 182 no Mane hamutuk 173,” Dehan Koordenadór CEFTEC Julio Lopes iha nia diskursu Delta Nova, Dili Tersa, 12/12/2023.
Iha ne’ebé Formandu sira ne’e tuir ona formasaun iha unidade hitu (7) maka hanesan: Unidade Multimédia, Unidade Komunikasaun, Relasaun Públika no Protokolu, Unidade Televizaun, Rádiu, Hakerek Imprensa, Lian Tétun Jornalizmu no Unidade Jestaun Komunikasaun iha Situasaun Krize.
Koordenadór ne’e hateten, Aktivida formasaun hirak ne’e hotu atu aumenta kapasidade di’ak liu tan ba formandu sira nia abilidade hodi kontribui ba instutuisaun iha área komunikasaun sosiál no setór públiku no privadu sira.
“Iha 2012, CEFTEC kompleta padraun nasionál no hetan ona akreditasaun husi Instituto Nasional de Desenvolvimentu da Mão de Obra (INDMO) ho Kualifikasaun nasionál nivel IV ho ida ne’e CEFTEC kontinua tau atensaun hodi asegura kualidade formasaun iha nivel nasionál no munisipál,” Nia relata.
Aleinde fó formasaun ba funsionáriu sira husi liña ministeriál ne’ebé hakna’ar an nu’udar ofisiál média no komunikasaun, relasaun públika no protokolu iha nivel nasionál, CEFTEC hala’o formasaun ho karakter On The Job Training iha nivel munisípiu ho karga oráriu formasaun oras 40, nu’udar programa prioritariu husi CEFTEC ne’ebé previstu ona iha Planu Asaun Anuál.
Iha fatin hanesan Reprezentante Formandu nivel nasionál Pascoela Franco hatutan, dezenvolvimentu pais ida ne’e depende ba nia rekursu umanu ne’ebé kualifikadu iha koñesimentu abilidade no esperiénsia.
“Hanesan mákina estadu iha área oioin hodi bele kontribui ba dezenvolvimentu nasaun nia rezultadu ne’ebé iha, sei mai husi hanoin ne’ebé polítiku, no ema ne’ebé polítiku sei fó rezultadu ne’ebé di’ak,” Nia tenik.
Governu karik sente hanesan sentru formasaun hodi hasa’e koñesimentu funsionáriu sira nia abilidade iha área téknika komunikasaun hanesan sidadaun iha vontade di’ak atu fó kontribuisaun ba rai doben ida ne’e.
“Ita labele sente ida ne’e hanesan oportunidade maibé konsidera nu’udar responsavel ida, nune’e bele fó han tomak no sei tau másimu durante formasaun hodi bele melora koñesimentu hodi hatudu prátika loroloron iha fatin servisu liu husi ideas kreativu no mós asaun sira ne’ebé produtivu,” Hakotu nia.
Jornalista : Gaudençia Belo
Editór : Orlando Magno
