Díli, Caicoli, 26/05/2026 – Iha ambitu talk show ne’ebé realiza iha Caicoli, Tenente Jeneral Forsa Falintil Defeza Timor-Leste (F-FDTL), Falur Rate Laek esplika forsa defeza iha papél importante tebes atu mantein dame no hametin unidade nasionál iha Timor-Leste.
Iha ambiente ne’ebé nakonu ho reflexaun kona-ba futuru instituisaun militar nian, nia reafirma katak F-FDTL la’ós de’it instituisaun seguransa, maibé mos simbolu hosi luta no sakrifísiu povu Timoroan durante tempu resisténsia.
“Nia mós hatete katak iha papél forsa defeza iha Timor-Leste importante tebes atu hametin dame no unidade nasionál, liu hosi esperiénsia no lisaun sira ne’ebé aprende durante tempu resisténsia,” hateten Tenente Jeneral Falur Rate Laek iha caicoli 26/05/2026.
Nia esplika katak transformasaun husi estrutura jerilla ba instituisaun militár modernu sai hanesan prosesu importante ida-ne’ebé kontinua harii ho baze profisionál sira, disiplina no kompromisu ba Estadu Demokratiku.
Iha parte seluk nia deklara katak transformasaun forsa defeza nian husi estrutura jestaun nian ba instituisaun militár modernu tenke mantein prinsípiu demokrátiku no respeitu ba direitus umanus,” nia dehan.
Durante nia intervensaun, Tenente Jeneral Falur Rate Laek mos hato’o katak koñesimentu estratéjiku resisténsia nian sei nafatin relevante atu guia dezenvolvimentu instituisaun militar iha tempu ohin.
“Nia akresenta, ilustrasaun ne’ebé ha’u hakarak fó mak kona-ba koñesimentu estratéjiku rezisténsia nian, ne’ebé durante ne’e sai baze importante ba projetu instituisaun iha Timor-Leste,” nia dehan.
Nia mós subliña katak prinsípiu disiplina koletiva, kompromisu no responsabilidade importante atu forma forsa defeza ne’ebé forte no respeitu husi povu.
Iha parte seluk, nia enfatiza nesesidade atu hasa’e konsiensializasaun nasionál kona-ba asuntu estratéjiku sira ne’ebé bele afeta futuru nasaun nian. Tuir nia, komprensaun partillada entre sidadaun no instituisaun Estadu importante atu garante estabilidade no unidade nasionál.
“Importante ba ita atu harii entendimentu ida ne’ebé fahe kona-ba asuntu estratéjiku sira ne’ebé bele determina futuru komún nasaun nian”, nia hakotu.
Liafuan hosi Tenente Jeneral Falur Rate Laek ne’e mos sai hanesan mensajen ida ba juventude no membru F-FDTL sira atu kontinua valoriza espírito resisténsia, maibé adapta ho realidade moderna no prinsipiu demokrátiku atu Timor-Leste bele kontinua moris iha dame no estabilidade.
Jornalista/Estajiado : Milenio da Costa
Editor : Ana Maria da Silva
