(Dili) Mudansa – Prezidente Repúblika (PR), José Ramos-Horta afirma, Timor-leste komemora ohin loron, aniversáriu 48.º ba Proklamasaun Independesia ba Repúblika Demokrática Timor-Leste nian, liu kuaze meiu sékulu, oan sira husi rai ida ne’e, ho hakarak ba autodeterminasaun hodi hetan independénsia.
“Ohin, ita la’ós fó-hanoin de’it momentu istóriku ida ne’e, maibé haree ba futuru ho responsabilidade atu kria dalan foun ba independénsia iha área hotu-hotu,” Prezidente Repúblika (PR), José Ramos-Horta dehan lia hirak ne’e, liu husi diskursu iha serimónia Aniversáriu Proklamasaun Independénsia ba Dala-48 iha Palásiu Prezidensiál, Bairo-Pite Tersa 28/11/2023.
Xefe estadu dehan, iha agrikultura, Timor-leste konvokadu atu emansipa-an husi limitasaun, dedika-an ba prátika sustentável no inovasaun teknolójiku, rai ne’ebé hotu-hotu kuda la’ós deit rai-isin, maibé ida-idak nia fundasaun ba seguransa alimentar.
No prosperidade ekonómika, hanesan mós, Timor-leste nia tasi no ai-laran ezije gestaun saudável no ekilibradu, atu prezerva rikeza natural ne’ebé ita erda.
“Esforsu atu hetan independénsia iha indústria no iha enerjia, importante tebes, ita tenke aproveita enerjia verde no renovavel, la’ós de’it hanesan kompromisu ambientál ida, maibé mós hanesan estratéjia ba emponderamentu enerjétiku,” Horta hatete.
Enkuantu, rekursu petróleu no minerál ne’ebé nasaun nian iha, dádiva husi rai laran, tenki esplora no transforma ho modu sustentavel, hodi garante benefísiu ne’ebé duradouru ba povu.
“Bee, esensiál ba moris, tenke jere ho sabedoria, ita nia independénsia seidauk kompleta, se ita la bele fó garantia ba asesu justu no sustentavel ba bee ba ema hotu-hotu. Ne’e dezafiu ida ne’ebé ita envolve an ho determinasaun, rekoñese katak, jestaun efisiente ba rekursu ida ne’e mak pré-rekijitu ida ba ita-nia dezenvolvimentu,” nia hakotu.
Jornalista : Mariano Do Santos Abi
Editór : Orlando Magno
