(Dili) Mudansa – Vice Primeiru Ministru Koordenador Assuntos Sosiais no Ministru Dezenvolvimentu Rural e Abitasaun Komunitária, Mariano Assanami Sabino informa, nia parte orgullu joven balu hamutuk iha fatin ida sai ajente ba mudansa no autór ba dezenvolvimentu
Vise Primeiru Ministru Assanami hato’o asuntu ne’e bainhira abertura feira Emprendedorizmu Foinsa’e 2023 ne’ebé organiza husi Ministeiru komérsiu Industria (MCI) Korea International no Cooperation Agency (KOICA) no (UNDP) iha Timor Plaza Komoro Dili. Kuarta, 18/10/2023.
“Ha’u apresia tebes ba joven ne’ebé ohin hamutuk iha fatin ida ne’e, tanba joven mak ajente ba mudansa no joven mak autór dezenvolvimentu prinsipál ba kontinua ita-nia nasaun ne’e ba oin,” Dehan Vise Premeiru Ministru Mariano Assanami liu husi ninia Diskursu. iha Plaza.
Nu’udar Vise Premeiru Ministru I reprezenta mós Primeiru Ministru haku’ak boot no apresiasaun ba joven sira hotu ne’ebé durante ne’e fó apoiu ba programa durante loron tolu atu aproveita didi’ak aprende hamutuk labele ta’uk hetan dezafius bainhira monu hamriik fila fali atu bele kontinua avansa.
Iha fatin hanesan Ministru Joventude Desportu Arte no Kultura (MJDAK) Nelio Isac Sarmento hatutan, nia sente kontente tanba bele akompaña foin-sa’e nia kapasidade hakarak aprende no mós partisipa dezenvolve rai iha setór ekonómiku.
“Ita hotu hatene katak pais Ida ne’e ho idade joven ne’ebé sirkulasaun maioria joven tanba ne’e dala ruma ita sempre temi joven hanesan ajénsia mudansa hahú husi hanoin atu partisipa iha ita-nia dezenvolvimentu,” Nia Informa
Nia Akresenta, Maneira Ida ne’ebé mak ohin husi MCI, KOICA, UNDP sira halo ne’e, maneira pozitivu oinsá joven sira bele partisipa iha dezenvolvimentu tanba ne’e joven sira hotu ne’ebé marka prezensa iha ne’e uza oportunidade hodi aprende.
“Tempu ita boot nia no tempu imi-nia Governu no estadu Ida ne’e, la husu buat ida atu imi oferese ba nasaun, maibé husu imi-nia tempu atu mai aprende hodi kontribui ba nasaun, tan ne’e ha’u parabéns ba imi no husu ba imi atu aproveita iha loron tolu ne’e ho di’ak nune’e bele susesu iha ita boot sira nia atividade,” Hakotu nia
Jornalista : Gaudencia Belo
Editór : Orlando Magno
