(Dili) Mudansa – Afendi Soares ho idade 16 hapara nia estudu iha 7 ano, tanba ekonomia família la sufisiente atu suporta nia hodi kontinua estudu, tanba Afendy deside mai kapitál Dili halo negósiu hodi sustenta fila fali família sira.
Afendy Soares orijen husi munisípiu Bobonaro postu Bobonaro Vila suku Hauba, oan husi Maria Soares no Miguel dos Santos, Afendy Soares nu’udar oan da sanulu husi maun alin na’in 17, ne’ebé kompostu husi feto 10 no mane 7.
Nia Hatutan husi maun biin no alin 17 ne’e, iha na’in 13 forma ona uma kain no hela 4 inklui Afendi mak sei klosan maibé na’in 1 de’it mak eskola.
“Ha’u mós hakarak kontinua eskola maibé Osan laiha atu selu eskola, ho ida ne’e ha’u sente ladi’ak entaun ha’u hapara tiha ha’u-nia eskola iha klase 7 ano iha EBC Hauba, tanba ami ema barak entaun inan aman osan kbiit la to’o atu suporta ami ho ida ne’e maka ha’u mai tiha Dili sosa Tomate ho ai-manas hodi fa’an de’it,” Konta Afendy ba jornalista média mudansa iha Taibesi 17 /10/2023.
nia konta, Afendy deside mai Dili hodi halo negósiu atu haree fila fali ninia alin nia eskola tanba inan aman sira nia forsa hahú menus ba dadaun ona.
“dala barak ha’u haruka osan ba alin no pai ho maen sira hodi sosa sira nia presiza no ajuda inan aman sira hodi sosa ba nesesidade loroloron,”Afendy Tenik
Feto Bonita ne’e afirma, tuku 8 dadeer Afendy sai uma ba fa’an ai-manas no tomate iha merkadu Taibesi to’o tuku 1 nia fila fali ba uma deskansa oituan no kontinua fali tuku 3 loraik hanesan baibain
“Aimanas ho tomate ne’e ha’u sosa raga ida $.20.00 fa’an ba butuk ida $.0,50 no tomate mós ha’u fa’an ho folin hanesan, kona-ba rendimentu depende ba ema sosa sorte di’ak ema sosa to’o $.20.00,”Katak nia
Maski rai manas kosar metan suli maibé nia la sente kolen no baruk maibé nafatin iha pasiénsia no vontade hodi leba ai-manas hodi hale’u merkadu Taibesi hodi fa’an
Jornalista : Domingas Viana
Editór : Orlando Magno
