(DILI), Palásiu Prezidensiál 17/07/2026 – Kantina Matak, sai fatin ba kampaña espesiál ida hodi fó kuidadu saúde nehan no teste moras jerál ba labarik ki’ik no komunidade kbiit-la’ek sira ne’ebé hela iha área oin Palásiu nian, Programa ne’e la’o liu husi parseria solidu entre inisiativa Kantina Matak ho ekipa médiku no estudante sira husi Universidade Singapura Oportunidade di’ak ba Labarik Kbiit-La’ek Sira.
Reprezentante Tradutór no Asesór, Bella Galhos, esplika katak programa ho kategoria kampaña dentál ida-ne’e la sai buat ne’ebé akontese beibeik, tan ne’e sai oportunidade furak tebes ba labarik sira hodi hamos nehan no (check-up).
“Programa dentál ida-ne’e halo beibeik ona, ita hatene katak programa dentál la’o beibeik iha ita-nia rain, liuliu ba kbiit-la’ek no labarik sira ne’ebé horik iha Palásiu Prezidensiál nia oin. Ida-ne’e mak oportunidade ne’ebé di’ak hodi hamos no cekup nehan.” Bella Galhos, Reprezentante Tradutór no Asesór.
Bella Galhos mós haktuir katak maski tarjetu prinsipál mak labarik ki’ik sira Kantina Matak, maibé nia fiar katak parseria ida-ne’e mós iha ligasaun no kooperasaun hamutuk ho Ministériu Solidariedade Sosiál no Programa Saúde ba Kantina Matak nu’udar prezente ba povu no sai unidade ba atividade ekonomiku liuhosi Kooperasaun Tinan 20 iha Timor-Leste
Iha fatin hanesan, Reprezentante husi Care Channels International of Singapore, Profesór Shing Chuan Hooi, deklara katak kampaña ida-ne’e nu’udar kontinuasaun husi relasaun servisu hamutuk ne’ebé naruk ona entre sira ho Timor-Leste.
“Programa ida ne’e hanesan aktividade kontinua nu’udar valór kooperasaun durante tina 20 nia laran iha Timor-Leste. Ohin ami hala’o foku ba nehan no mós cekup jerál hodi bele identifika moras ruma husi labarik ki’ik sira.”Profesor Shing Chuan Hooi, Care Channels International of Singapore.
Profesór Shing Chuan mós aumenta katak rezultadu husi identifikasaun moras ne’e sei hato’o fila fali ba Palásiu Prezidensiál, hodi nune’e bele haree hikas hodi foti asaun tratamentu ka operasaun ruma ne’ebé presiza.Operasaun solidariedade ne’e konsege la’o tanba hetan apoiu husi dapur Prezidensiál nian. Inisiativa ne’ebé hahú husi tinan 2022, ida ne’e la’ós kampaña dahuluk husi Prezidente Repúblika, maibé ne’e dala rua ona ekipa médiku no estudante sira husi Singapura mai fó apoiu no ajuda ba povu Timor-Leste liuhusi kooperasaun ho organizasaun internasionál no nasionál sira.
Jornalista estajiada :Natália de Carvalho Gomes/Melania de Jesus
Editóra : Ana Maria da Sailva
