(Dili) Mudansa – Diretora fundasaun Caucus Teresinha Maria Noronha Cardoso Informa, kandidatura feto sira 241 husi munisípiu 13 inklui RAEOA ne’ebé manifesta ona kandidatura iha País ida ne’e feto ne’ebé iha inisiativa no estudu ne’ebé altu.
Diretóra Teresinha fó sai dadus ne’e iha Atividade ne’ebé realiza husi Fundasaun Caucus hamutuk ho PLAN Internasional Timor-Leste Kolokiu Nasional ho tema “Hakbi’it partisipasaun Feto, Joven no Ema ho Defisiensia hodi kompete iha Eleisaun Suku 2023.
Nia haktuir, Feto iha polítika ho PLAN International realiza atu fokus liu oinsá atu promove profile kandidatura feto sira husi munisípiu 13 inklui RAEOA ne’ebé manifesta ona sira nia kandidatura hodi fortifika liu demokrasia iha nasaun Ida ne’e.
“Ita hare feto 241 maioria Joventude iha inisiativa hakarak atu kontribui hahú kedas dezenvolvimentu lokál tanba sira ne’e mai ho begraun estudu ne’ebé altu no esperiénsia lubuk,” Dehan Diretora Fundasaun Caucus Teresinha Maria ba jornalista sira iha salaun Delta Nova, 24/10/2023.
Diretóra Informa, apresiasaun feto maluk Joventude sira no ema defisiénsia ne’ebé hola parte iha prosesu kandidatura ne’e, ohin loron komunidade rona sira nia lian polítika saida mak iha Konseitu sira bele eleitu karik bele dezenvolve iha ida-idak nia Suku.
“Ha’u fiar ita hotu-hotu bele akompaña sira no fó korajen ba sira atu bele kontinua konkista nafatin Eleitores no ita sira ne’e mós hola parte vota ba sira tanba ita rona sira nia pensamentu polítika di’ak tebes hakarak kontribui hahú husi baze ne’ebé forte hodi kontribui ba dezenvolvimentu lokál,” nia Afirma.
Fundasaun Caucus hamutuk ho parseiru akompaña feto sira nia prosesu kandidatura enfrenta problema entaun nafatin fasilita sira atu manán ka la manán ne’e la’ós problema ida maibé nia manifesta ona nia kandidatura iha eleisaun suku.
“Ha’u hanesan Timor oan orgullu no agradese tebes ita-nia sistema Lei garante oportunidade nakloke ona feto ho mane no mós Joventude defisiénsia kualkér elementu ne’ebé hola ona parte no fila fali ba vontade ema ida-idak nia.
Nia deklara, hare ba esperiénsia uluk feto barak hetan presaun hetan ameasa no hetan obstákulu husi família maibé 20 independénsia eleisaun ba 4 komesa feto livre tanba prosesu kandidatura buat hotu la’o di’ak.
“Involvimentu atu ukun suku ne’e la’ós mane de’it, agora ita-nia nasaun sistema demokrasia apresia tebes tanba feto maluk ho begraun Ida remata universidade hakarak kontribui iha suku hanesan feto kontente ba ita-nia pais Ida ne’e,” Hakotu Diretora Fundasaun.
Iha fatin hanesan, Diretora PLAN Internasional Timor-Leste Fátima Estela Soares argumenta, Plan Internasional sai sasin no akompaña iha área ne’ebé Plan servisu ba, oinsá xefe suku atuál sira ne’e sai hanesan ajente ba mudansa no modelu, foti asaun ne’ebé motiva iha prosesu dezenvolvimentu.
“Motiva ba sira seluk ne’ebé hamriik iha tinan ida ne’e ka ba períodu tinan 7 oin mai hanesan iha dadus feto foin-sa’e atus rua resin ne’ebé kandidatu an ba órgaun suku, Atu hatete foin-sa’e ne’e ami sente hanesan orgullu boot ida hodi haree mudansa ne’ebé akontese iha suku,” Nia Akresenta.
Nia relata, Bazeia ba Plan nia observasaun ne’ebé iha, barreira ba feto atu hola parte iha área polítiku lideransa la fasil Dala ruma sente ta’uk no sente dúvida ba barreira ne’ebé iha, maibé katak ida ne’e prosesu husi mehi.
“Feto foin-sa’e tenke brani, oinsá atu haboot ita-nia mehi, deskobre valór ne’ebé iha atu bele sai autór ba Dezenvolvimentu iha komunidade, lidera ho ita-nia maneira rasik no koletivu konkluzivu ba nia prosesu tomak,” Nia Informa.
Diretóra Plan sujere, hamutuk nafatin ho Plan Internasional hodi promove profile feto sira nian ne’ebé iha, liu husi média no mós liu husi Plan nia plataforma online sira.
Entretantu tuir dadus ne’ebé média mudansa asesu totál kandidatura xefe suku iha territóriu Timor laran tomak hamutuk na’in 2.117 kompostu husi feto 241 (11.38%) no mane hamutuk 1876 (88.62%).
Jornalista : Gaudencia Belo
Editór : Orlando Magno
