(Dili) Mudansa – Veronica do Rosário da Silva mak individu feto ida ne’ebé iha konviksaun hakarak sai kandidatura independente ba xefe Suku Vila-Verde periodu 2024-2030 ho objetivu prinsipál atu dezenvolve suku tuir vizaun no misaun ne’ebé nia iha.
kandidatura ne’e ho idade haat nulu resin tolu (43), remata nia estudu lisensiatura iha Universidade da Paz (UNPAZ) iha 2016 no esperiensia servisu hanesan Xefe Aldeia Mate-moris suku Vila-Verde iha tinan 2020 até ohin loron, nia iha abilidade bele ko’alia lian hamutuk haat (4), mak hanesan, Tetun, Inglês, Indonézia, no Portuges.
“Ba pozisaun prestijiozu ida ne’e kondúz ha’u nia komitmentu profundu ba dezenvolvimentu suku ida ne’ebé garante prosperiedade ba ema hotu,” dehan Kandidatura xefe suku Vila-Verde, Veronica do Rosário da Silva ba jornalista Media Mudansa iha nia hela fatin Aldea Mate-Moris, Tersa (19/09/2023).
Veronica servisu nu’udar Xefe Aldea durante tinan tolu (3) fó ba nia esperiénsia no kompreensaun ne’ebé valioza kobre dinámika no desafiu komplikadu sira ne’ebé komunidade enfrienta. Tanba ne’e nia motivadu hakarak kandidata an ba xefe suku hodi lori suku ba futuru ida di’ak liu. Atu garante moris di’ak ba komunidade suku nia mai ho karakter lider ida ne’ebé inkluzivu, transparansia no loke tilun ba aspirasaun no preokupasaun komunidade nian.
Veronica mai ho vizaun ida klaru mak, realizasaun komunidade suku ne’ebé justu, prósperu, independente, no moris kultura ho governasaun di’ak liuhusi espíritu kooperasaun mútua ho parte hotu.
Atu hatan ba vizaun iha leten nia mai ho misaun haat (4) ne’ebé importante mak hanesan tuir mai ne’e;
- Prioriza deliberasaun no transparénsia iha governasaun suku nian.
- Mellora servisu máximu ba komunidade suku no kompetitividade suku nian.
- Promove moris harmonia hamutuk ho respeitu mútua no eleva papél ativu joven sira iha atividade ekonómiku no atividade joven.
- realiza seguransa iha suku.
Veronica mai ho nia moto ida katak “Hametin unidade iha suku, ba futuru ida naroman liu” signifika katak hosi nia lideransa durante nia mandatu, hakarak atu hametin integridade komunidade nian no lori suku ba futuru ida prosperu liu.
Atu konkretiza vizaun no misaun sira ne’ebé define ona Veronica mai ho nia Programa Prioridade sira mak hanesan tuir mai ne’e;
Promove rezolusaun konflitu no paz iha suku, organiza workshop no treinamentu kona-ba rezolusaun konflitu no kria grupu sira ida-idak atu tau matan ba posibilidade konflitu. Promove dialogu entre komunidade hodi identifika kauza konflitu no halo planu sira atu haforsa paz iha suku.
Eleva Kreatividade iha Área Desportu, estabelese klubu desportu ba joven sira no organiza kompetisaun desportu lokál. Hanesan promove rekursu sira ba treinamentu no fasilita partisipasaun desportu ba ema hotu-hotu iha suku.
Promove transparánsia no imparsialidade iha suku, kria mekanismu transparánsia ba desizaun governasaun suku nian no hetan partisipasaun komunidade iha prosesu desizaun. Promove treinamentu ba membru governu suku kona-ba prinsípiu imparsialidade no responsabilidade ba komunidade.
Halo Mitigasaun ba dezastre naturais no hametin ambiente saudável, kria planu mitigasaun ba dezastre naturais no halo sensibilizasaun komunidade kona-ba emerjénsia dezastre. Organiza aksaun limpeza ambientál no kampaña reflorestasaun.
Dezenvolve suku hontane aas kultura iha suku, Promove eventu kultura sira hanesan festival, no ekspozisaun arte. Apoia grupu sira ne’ebé hakerek no promove kultura tradisionál suku nian.
Dezenvolve kreatividade no inovatividade komunitária, estabelese programa formasaun no mentoria ba empreza lokal no produtu sira ne’ebé sira prodús.
“Ho programa hirak ne’e ha’u fiar katak komunidade sira iha aldea sia ne’e bele fo konfiansa mai ha’u hodi lídera suku Vila-Verde ne’e no hametin unidade iha suku, ba futuru ida naroman liu”. Nia Hakotu
Jornalista : Arveria da Silva Martins
Editor : Felisberto F. da Costa
