(Dili ) Mudansa – Bainhira tuir teste ruma keta laran taridu no lalika lakon vontade bainhira fó sai rezultadu la pasa tanba Buat hotu tuir nia prosesu, ho ida ne’e nafatin esforsu an hodi hein oportunidade tuir mai nune’e bele realiza mehi ne’ebé iha.
Asuntu ne’e relata husi Diretor Diresaun Nasional Empregu Exterior (DNEE), Filomeno Soares, ba Jornalista iha edifísiu SEFOPE Becora Dili, Tersa, 19/09/2023.
Bainhira Sekretáriu Estadu formasaun profisionál empregu (SEFOPE), liu husi DNEE hamutuk ho delegasaun husi Ministeriu Traballador Kórea ne’ebé realiza teste skil no saúde ba timor oan hamutuk 490 hodi ba servisu iha Koréa dó Súl.
“Kandidatu sira karik la pasa lalika pesimista maibé nafatin iha optimista hodi hein oportunidade tuir mai loron ida imi-nia mehi hakarak ba servisu iha Korea ne’e sai realidade,” Diretór DNEE Filomino relata.
Nia afirma, Kandidatu Traballadór Korea Súl ne’ebé tuir teste skil no fíziku hamutuk na’in 490 ne’ebé kompostu husi feto 20, no mane na’in 470, nune’e mós kandidatu sira ne’e prienxe ona rekezitu husi SEFOPE.
“Ekipa ne’ebé fó teste ba kandidatura Traballadór Timoroan sira , hotu-hotu uza kartaun mak foin tama ba salaun laran, no fó teste ho disiplina tanba ,teste skil ne’e rigorozu tebes, nune’e teste skil ne’e murni, laiha teste ida mak dehan familiarista,” Filomino deklara.
Iha fatin hanesan, MR.Park Sehoon haktuir valór ne’ebé atu fó ba traballadór sira sei foti husi sistema tan ne’e orientadór sira sei haree rezultadu teste finál ne’ebé automatikamente tama iha sistema, no kritéria selesaun la’ós haree ba diploma maibé haree husi sira ninia valór.
“Objektivu primeiru teste skil ida ne’e foti sira ninia valór ba teste lian Korea nia sira sei haree mós estudante sira nia kapasidade fíziku no data pessoais, altura no todan nune’e mós haree sira nia vontade no oinsá ko’alia lian Korea,” katak Mr.Park Sehoon
Nia relata, Teste ohin loron hanesan teste skil ida ba traballadór Korea ne’ebé pasa ona iha lian Korea hodi konfirma sira ninia lista prezensa fó númeru ba estudante sira tuir teste skil depois tuir tan teste fíziku ikus liu mak fó entrevista.
“Servisu indústria hanesan solda ró, bainhira sira tama ona ba ró atu servisu entaun presiza ema ne’ebé ain badak tanba fasil ba sira atu tama ba ró laran, ita tetu todan no altura orsida emprezáriu sira mak haree direitamemte traballadór ida ne’ebé di’ak liu ba sira nia indústria,” katak MR. Park Sehoon.
Nia akresenta, Skil teste báziku fahe ba prosesu tolu, primeiru sukat no monta, segundu tara korenti hanesan tuir ninia size ne’ebé mak iha, terseiru sira tuu ai-kabelak ida depois haree ninia kapasidade ho nia velosidade servisu.
Jornalista : Domingas Viana
Editór : Orlando Magno
