(Nova Iorkè) Mudansa – Iha Asembleia Jerál Nasoins Unidas nian ba da-78 (UNGA sigla inglesh) nian ba da-78 iha Nova Iorke, Estados Unidos Amérika (EUA), Prezidente Repúblika (PR), José Ramos-Horta afirma katak, nasaun Timor-Leste haraik aan la’o ba oin atu harii nasaun nakloke ba mundu.
“Ami nu’udar sosiedade multikulturál, multirrelijioza, multilingé no multiétnika, ami haraik-an no la’o ba oin nafatin hodi harii nasaun nakloke ba mundu, nu’udar tolerante no hadook hosi ódiu no violénsia, ami nia populasaun barak liu maka nu’udar ho fiar katóliku, hale’u 98%, no buras moris sori-sorin ho maun-alin sira ho fiar seluk hanesan protestante no musulmanu,” Diskursu Xefe Estadu nian ne’ebé Média Mudansa asesu husi ekipa SKS-PR.
Xefe Estadu aumenta, tuir “Índise ba Demokrasia” husi revista The Economist, Timor-Leste nu’udar país demokrátiku liu iha Sudeste Aziátiku, tuir Repórteres Sem Fronteiras nia “Índice Mundiál de Liberdade de Imprensa” Timor-Leste hetan fatin 10º iha nível mundiál ba liberdade imprensa.
Hori kedas independénsia iha tinan 2002, Timor-Leste nia demokrasia buras, moris hela no ho laran-ksolok. Timor-Leste hala’o tiha ona eleisaun prezidensiál lima (5) no eleisaun lejislativa neen (6) badinas ho kompetisaun, ho dalan nakloke ba sira hotu ne’ebé kompete malu maibé iha liberdade no orden nia laran.
Setór hotu-hotu hosi Timor-Leste nia sosiedade no mós observadór internasionál sira hotu rekoñese katak, eleisaun lejislativa ne’ebé hala’o tiha iha loron 21 fulan maiu 2023 nu’udar eleisaun livre no justu, hodi loke dalan ba IX Governu Konstitusionál bele hahú ukun iha loron 1 fulan Jullu 2023 ho Primeiru Ministru (PM) Xanana Gusmão iha oin.
“Ami-nia demokrasia sei joven hela, kmanek maske la’ós perfeitu, oazis ida ho dame, toleránsia no liberdade, ho demokrasia lakan nabilan. Timor-Leste la iha violénsia polítika, la iha lia-sakar ka haketak bazeia ba razaun étnika ka relijioza. Ami la iha krime organizadu doméstiku ka ema asalta ema ho kilat iha liman,” PR Horta dehan.
Xefe estadu mós afirma katak, maske hatún nível moris husi mukit, maibé Timor-Leste sei iha ema barak ki’ak hale’u 45,8%, atu foti sa’e povu dook hosi ki’ak rabat-rai, husi hamlaha, husi moras rakítiku ho isin krekas no la buras, labarik sira la han di’ak no tenke tau matan ba inan sira, maka nu’udar hahalok balu TL tenke hala’o hodi hasoru susar hirak ne’e hotu iha tinan 5 tuir mai nia laran.
PR Horta konta, hetan independénsia iha tinan 20 liubá, iha indikadór ekonómiku no sosiál ne’ebé hatudu katak, buat balu hetan progresu iha Timor-Leste, liu-liu, esperansa ba vida, komparasaun uluk iha tinan 2002, ho idade tinan 60, iha tempu daudauk hasa’e ba idade tinan 70, hamenus ki’ak no hamenus mós labarik mate bainhira sei kosok-oan hela, iha tinan 2002 TL iha médiku na’in-21 no ohin loron, tuir dadus hosi tinan-2022, TL iha liu médiku 1,200.
“Ne’e la’o ho di’ak tanba solidariedade hosi Cuba, maske ami nia Governu rasik halo nia parte ho tulun liu husi programa sanitária ne’ebé la’o mós ba daudauk,” Xefe Estadu dehan.
Enkuantu iha tinan 2002, Timor-Leste nia sidade kapitál nia serbisu enerjia elétrika la’o ladi’ak, ahi lakan-mate beibeik, no iha fatin seluk ahi la iha liu, maibé ohin loron, rai Timor iha enerjia elétrika hodi naroman 96,1% no iha fatin dook iha foho, uma balu hahú lakan liu husi painél solar loro nian.
“Koneksaun ba telemóvel kona besik rai klaran tomak no internet mós nakloke ba ema barak. Situasaun ida ne’e sei la’o di’ak liu, iha tinan 2 ka 3 nia laran, bainhira ami instala kabu fibra ótika liu husi tasi okos hodi halo ligasaun ba mundu tomak,” PR Horta deklara.
Jornalista: Mariano Do Santos Abi
Editor: Felisberto F. Da Costa
