(Nova Iorkè) Mudansa – Relasiona ho preokupasaun Prezidente Repúblika (PR), José Ramos-Horta nian katak, violasaun domestika makaas iha Timor-Leste, maibé Organisasaun Nasoens Unidas (ONU) rekoñese nasaun Timor-Leste la’o ba oin ho Kuadrus Jurídiku no banati tuir internasionál.
“Hala’ok ida ne’ebé ami laran taridu maka viiolénsia doméstika ne’ebé maka’as iha ami-nia leet, maibé ONU rekoñese katak, Timor-Leste la’o ba oin kona-ba implementasaun ho kuadru jurídiku banati tuir internasionál,” Diskursu Xefe Estadu nian ne’ebé Média Mudansa asesu husi ekipa SKS-PR, iha Sesta 22/09/2023.
Xefe Estadu haktuir, tuir mós konvensaun ba hakotu diskriminasaun ne’ebé de’it kontra feto, konvensaun kona-ba Direitu ba ema ho defisiénsia fízika, no rezolusaun 1325 husi Konsellu Seguransa Nasoens Unidas (KSNU) nian kona-ba Igualdade Jéneru nian no hafoti no hasa’e feto nia fatin iha edukasaun, sosiedade no polítika.
PR Horta mós afirma, iha tinan 2022, TL hahú Asaun Nasionál atu hakotu Violénsia bazeia ba jéneru iha tinan sanulu nia laran, Governu hala’o knaar lisuk hamutuk ho organizasaun husi sosiedade sivíl no ho setór feto hosi ONU, kona-ba dezenvolvimentu planu daruak ba Asaun Nasionál, hodi aplika Rezolusaun 1325 hosi Konsellu Seguransa Nasoens Unidas nian kona-ba Feto, Dame no Seguransa.
Aprova tiha ona lei ne’ebé promove igualdade ba mane no feto, iha lei hirak ne’e nia laran iha ida ne’ebé hatuur rejime kontribuisaun ba seguransa sosiál, lei ida seluk ne’ebé hatuur rejime espesiál ba definisaun propriedade, hanesan uma no rai, no lei ida mós hodi fó kbiit ba feto no mane atu partisipa iha pozisaun lideransa iha nível Suku no Aldeia, no katak, naran iha feto ida atu konkorre ba eleisaun Xefe Suku.
Tatuir serbisu hamutuk ho parseiru dezenvolvimentu nian, Organizasaun Feto hosi ONU no mós UNICEF, TL haburas oin ida ne’ebé feto no labarik iha dalan klaran lori ba oin, hodi fó hanoin feto nia knaar atu harii iha futuru.
“Ami nia hala’ok hodi fó tulun ba feto hahú ho soru-tais no fó formasaun ba sira atu hetan kbiit hodi harii sira nia rai rasik atu bele halo no fa’an. Ami nia haree luan no naruk hamutuk ho belun no maluk kleur nian, hanesan Nasoens Unidas, daudauk ne’e ami habiit kapasidade umana iha setór hotu-hotu, atu prepara-an hodi tama iha ASEAN maibé atu halekar mós kauza igualdade ba jéneru no direitu ema nian iha Timor-Leste no mós iha rejiaun,” PR Horta realsa.
Enkuantu iha tinan balu ikus mai, TL hala’o progresu kona-ba promove lideransa feto nian iha nível nasionál, tan daudauk kadeira 34% iha Parlamentu Nasionál (PN) feto maka okupa.
“Sasukat ne’e, hodi tetu ho rai seluk, hatudu katak iha média rejionál iha 19% no média mundiál maka iha 29%, iha Prezidénsia, pozisaun tolu boot liu, hanesan Xefe Gabinete, Xefe Adjuntu Gabinete no Diretór Nasionál ba Administrasaun, feto maka okupa,” PR Horta dehan.
Jornalista: Mariano Do Santos Abi
Editor: Felisberto F. Da Costa
