(Dili) Mudansa – Prezidente Repúblika (PR), José Ramos-Horta kondekora hakerek na’in Timoroan, Luís Cardoso de Noronha “Takas” ho Kolar Orden Timor-Leste, iha dekretu Prezidente Repúblika nú.74/2023 hodi atribui kondekorasaun.
Xefe Estadu konsidera Luís Cardoso, dezempeñu atividade sira ho importánsia aas ba kauza autodeterminasaun no independénsia Timor-Leste, liu husi knaar ne’ebé nia hala’o nu’udar reprezentante Konsellu Nasionál Rezisténsia Maubere (CNRM), iha Portugal.
hodi serbisu hamutuk ho reprezentante espesiál CNRM no Laureadu Nobel ba Pás, José Ramos-Horta.
Aleinde Luís Cardoso mós hola parte iha delegasaun Rezisténsia Timoroan ne’ebé hasoru malu ho antigu Prezidente Áfrika Sul, Nelson Mandela, iha Lizboa, Portugal.
“Kondekorasaun ne’e hanesan rekoñesimentu ida tanba Takas halo ami orgullu no hariku literatura Timoroan, bainhira lee livru sira husi hakerek na’in ne’ebé tradús ba lian oioin, iha nasaun barak no sujeitu ba krítika literária iha jornál internasionál,” Xefe Estadu afirma hafoin atribui medalla Korál ba Luis Cardoso iha Palásiu Prezidensiál, Bairo-Pite, Kinta 17/08/2023.
Xefe Estadu mós rekoñese Luís Cardoso, la’os de’it hanesan mestre boot literatura Timor nian, maibé mós ba lian seluk husi nasaun barak.
Ho ida ne’e, Prezidénsia Repúblika no instituisaun Estadu no privada sira bele halo, hodi insentiva abitua lee iha Timor-Leste, maka fó koñese autór sira husi área ida ne’e ba joven no ba poténsia lee na’in sira.
Iha fatin hanesan hakerek na’in (Eskritór) Timoroan, Luís Cardoso de Noronha “Takas” dehan, nia parte konsidera kondekorasaun ne’e hanesan buat ne’ebé Estadu fó ba nia sidadaun ida ba serbisu relevante.
“Ha’u la halo traballu relevante ida ba ha’u nia rain, durante tinan 20 liu ba, maibé presta de’it ha’u nia kontribuisaun ba ezisténsia literatura Timoroan nian, sedu ka tarde ita sei iha hakerek na’in estraordináriu iha Timor-Leste,” Takas subliña
Iha Dekretu-Lei númeru 20/2009, Orden Timor Leste nu’udar rekoñesimentu husi Estadu ba sidadaun nasionál ka ema estranjeiru, ne’ebé halo atividade profisionál, sosiál ka asaun espontánea nakonu ho korajen, fó kontribuisaun boot ba Timor-Leste, ba Timoroan ka ba umanidade.
Eskritór Luís Cardoso rekoñese, internasionalmente no manán na’in Prémiu Oseanu, ida husi prémiu literáriu respeitadu liu iha mundu luzófonu, hakerek ona livru hitu (7), inklui novella, kontu, no ensaiu ne’ebé tradús ba lian oioin iha obra sira, dala barak esplora tema hanesan funu, eziliu no luta ba independénsia.
Luís Cardoso, oan husi enfermeiru ida ne’ebé hala’o knaar iha fatin barak iha Timor-Leste, moris iha Cailaco, Bobonaro, iha 1958. No estuda iha Koléjiu misionáriu Soibada no Fuiloro tuir mai, iha Semináriu Dare no Liseu Dr. Francisco Machado, Díli. Nia hela iha Timor-Leste to’o de’it tinan 18, hafoin muda ba hela iha Portugal no remata kursu lisensiatura iha silvikultura, iha Institutu Superior Agronomia Lizboa.
Jornalista: Mariano Do Santos Abi
Editór : Orlando Magno
