(Dili) Mudansa – Eskritór Timor-Leste, Luís Cardoso “Takas”, ne’ebé hetan Prémiu Oseanu iha tinan 2021 no públika ona livru barak, nune’e husu ba Timoroan sira atu badinas lee livru nunee iha futuru aumenta vokabulariu, hodi halo buat barak.
Eskritór Luís Cardoso “Takas” afirma, atu sai eskritór tenke peskiza no lee livru barak, hakerek uitoan kada loron bainhira hetan liafuan inportante ruma.
“Ha’u husu ba Timoroan sira lee livru lalika estraga tempu ba buat neebe la iha vantajen ba ita nia futuru, Ne’e duni joven sira atu sai eskritór tenke lee barak, nune’e aban bainrua hatene domina vokabulariu entaun ita mos bele hakerek ona livru,” nia dehan ba Jornalista sira iha salaun VIP Aeroportu Internasionál Komoro Dili, Kuarta, 16/08/2023.
Eskritór Timoroan ne’e dehan tan, ida-idak hatene buat sira ne’e, bainhira hakerek ona ne’e aumenta ona vokabulariu sai makaas hodi tau repete liafuan sira, ne’e duni tenke lee livru makaas.
Lee livru maka’as hodi hakerek didi’ak liu tan, ne’e mak eskritór, buat hotu-hotu tenke serbisu maka’as, ho ida ne’e mós nasaun barak maka traduz livru hirak ne’ebé eskritór Luis Cardoso hakerek hanesan iha Inglatera, Francesa, Alemão, Dinamarka no seluk tan.
Livru sira ne’ebé eskritór Luis Cardoso hakerek ho lian Portugues de’it, balu traduz ba lian seluk maibe Livru dahuluk Cronico de Materrasia, Olhos de Crusa, Olhos de Gato Bravo, Ultimo Morte de Coronel Santiago, Requin Para o Navegador Solitariu kona-ba II Guera mundiál Japonese sira uluk invade Timor-Leste.
Nia konta iha Portugal, tempu okupasaun nian Reprezentante Consellu Nacional Resistensia Maubere (CNRM), iha Portugal tuur hamutuk ho Prezidente Repúblika atuál, José Ramos-Horta, uluk Xefe Estadu hanesan Reprezentante Espesiál CNRM nian.
“Livru ne’e, ha’u hakerek kona-ba istória Timor, entaun saida mak Timoroan hotu-hotu bele hakerek buat ne’ebé hanesan sira nia testamuñu ita halo istória ba Timor nian,” Takas informa.
Nia subliña, hanesan buat ne’ebe Timor-leste nia Funu no luta tanba hirak ne’e mak tau iha livru, mezmu ke Remas, Poezia no Istória, nune’e aban bainrua hela ba memoria nasaun nian.
Tanba ne’e Takas husu ba Timoroan hotu, neebe iha interesante atu hakerek bele lao tuir, maibé ida-idak buka nia dalan hodi hakerek di’ak no furak liu tan.
“Ha’u haree Timoroan barak halo sira nia Coutts furak teb-tebes, tanba ne’e balu manán premiu hosi Fundasaun Oriente. Timoroan barak sai eskritór di’ak teb-tebes, tanba ha’u iha esperansa boot futuru mai Timoroan barak bele sai Eskritór,” nia hakotu.
Jornalista : Mariano dos Santos Abi
Editór : Orlando Magno
