(Dili) Mudansa – Iha Tempu badak Prezidente Parlamentu Nasionál (PPN), Maria Fernanda Lay sei vizita estadu no halo reuniaun Comunidade dos Países da Língua Portuguesa (CPLP) iha São Tome e Príncipe tuir loloos Prezidente Repúblika (PR), José Ramos-Horta maibé Xefe Estadu iha ajenda seluk.
“Assuntu prinsipál ne’ebé lori ha’u mai iha ne’e, tanba ha’u ba reprezenta Prezidente Repúblika vizita estadu iha São Tome e Príncipe, ne’ebé loloos Prezidente Repúblika mak ba maibe nia iha ajenda seluk,” PPN Fernanda dehan ba Jornalista sira hafoin enkontru ho PR Horta iha Palásiu Prezidensiál, Bairo-Pite, Kuarta 16/08/2023.
Ho ida ne’e PPN Fernanda Lay hato’o ba Xefe Estadu kona-ba antes reuniaun Asenmbleia Jerál ASEAN Inter-Parliamentary Assembly (AIPA) ba dala 44, iha Jakarta Indonézia, iha loron 5 too 10 fulan agosto tinan 2023.
“Ha’u hato’o ba partisipasaun Asembleia Parlamentár ASEAN (APA) iha Jakarta semana kotuk, hodi hato’o saida maka ami hato’o konkordansia iha ne’ebá no mós paises sira ne’ebé fó apoiu tomak mai Timor-Leste hodi tama ba ASEAN,” Fernanda Lay dehan.
Nia hatutan, asuntu rua maka ohin hato’o ba Prezidente Repúblika, ida partisipasaun reprezenta Estadu iha São Tome e Príncipe ho mós atividade ne’ebé hala’o tiha ona iha AIPA, kona-ba delegasaun ba reuniaun CPLP nian sei aranka iha 21 ou 22 fulan ne’e.
PPN Fernanda Lay husu ba Xefe Estadu tanba iha desizaun ne’ebé tenke foti durante reuniaun iha CPLP no sira husu atu Timor-leste sai hanesan uma nain ba CPLP iha tinan 2025 ou 2027, tan ne’e maka husu Prezidente Repúblika atu aseita ka lae.
“Maibé prezidente la aseita tanba ita mós sei tama ba ASEAN iha tinan 2025, ida ne’e maka ha’u sei hato’o la bele aseita atividade internasionál rua hodi sai dala ida de’it iha Timor-Leste ne’ebé simultaneamente iha tinan 2025, ne’ebé ba CPLP talves ita adia ba tinan seluk ou tinan rua seluk mai, tanba ita sei simu uluk ASEAN ninia iha tinan 2025,” nia hakotu.
Jornalista : Mariano Do Santos Abi
Editor : Orlando Magno
