Abel Planu Hela Atu Halo Mini Indústria Iha Munisípiu Aileu

banner 120x600

(Aileu) Mudansa – Prezidente Autoridade Munisípiu Aileu, Abel da Conceição informa, Aileu Potensiál tebetebes no prioridade ba dezenvolvimentu agrikultura, nia hanoin atu ona mini indústria hodi halo produsaun iha munisípiu Aileu.

Abel haktuir, 2023 Autoridade iha planu ona orsamentu nune’e 2024 tenke dezenvolve área pekuária ho orsamentu por volta $.500.000.00. sei fó ba área agrikultura hodi bele dezenvolve pekuária no horti kultura.

“Ita hili produtu balu atu eleva mini indústria hanesan Kafé Aileu, produsaun sira iha ne’e, tanba ita iha ona hanoin ba mini indústria hodi halo produsaun boot no aumenta,” dehan Prezidente Autoridade Munisípiu Aileu, Abel da Conceição iha resintu Diresaun Serbisu Agrikultura Munísipiu Aileu, Segunda, 14/08/2023.

Nia hanoin ona área Plantas Industria liuliu iha ai-nanás iha suku Taletu, ne’ebé kada tinan ninia produsaun maka’as, entaun parte nia hanoin ona ninia bahanmenta iha ona, nune’e oinsá bele eleva ona ba iha mini indústria sira hodi halo fali malmarada sira ne’e.

“Agora hahú ona, tinan oin ita halo peskiza no lori ita nia grupu sira ba estudu komparativu iha rai li’ur, nune’e sira fila mai bele dezenvolve rasik,” nia kompromete.

Alende ne’e mós husi osan $.500.000.00. ne’ebé Autoridade Munisípiu Aileu atu aloka ba diresaun agrikultura nian iha Munisípiu Aileu, iha ona Planu Asaun Anuál (PAA) atu halo viveirus ou produs ai oan sira.

“Ha’u orienta ba Diretór Agrikultura Munísipiu ne’ebé kada tinan tenke iha tarjeitu, kada tinan ita presiza rai hektar hira maka kuda ai oan, kada tinan ai oan hira maka ita prodús ou halo viveirus,” Abel relata.

Nia alerta, serbisu tenke iha tarzetu, maka Autoridade Munisípiu Aileu orienta ona Diretór Diresaun Agrikultura Munísipiu Aileu nian iha tinan kotuk kuda ona ai-oan sira iha hektar balu, no mos Autoridade tau orsamentu kada tinan hodi halo viveirus ne’ebé lokaliza iha suku Liurai.

“Iha 2023 ita tau orsamentu atu prodús ai-oan sira no mós tinan oin ita iha programa ida naran PAA ba iha diresaun Agrikultura Munísipiu nian nune’e kada tinan ita tenke prodús ai oan hodi fahe ba ita-nia delegasaun territoriál floresta ho guarda floresta sira iha Munísipiu, nune’e bele hamatak ita-nia Munísipiu Aileu,” Abel hatete.

observasaun públiku iha Aileu, ai akasimaniu maka domina, ida ne’e Autoridade tau tiha hodi halo rai ne’e metan, depois maka sei haree ninia mudansa tuir mai, nune’e rai ne’e muda ona ba metan uitoan maka halo fali peskiza ida kona-ba ai nian, hodi bele troka fali ai akasimaniu ne’e.

“Ne’ebé ita ko’alia kona-ba Mudansa ne’e fazeadamente no ne’e la fasil, tanba ita la dehan katak, ohin nia muda kedas mais ne’e prosesu, ne’ebé ai akasimaniu ne’e maka serbí depois ba oin maka ita haree fali ai saida maka bele troka fali ai akasimaniu ne’e,” nia hakotu.

Jornalista : Mariano Do Santos Abi

Editor       : Orlando Magno

banner 325x300