(Aileu) Mudansa – Atu proteje no kuidadu ai-horis no bee, proteje animál fuik sira iha ai-laran tuan, tanba hirak ne’e mak rikusoin ne’ebé importante ba rai doben Timor-Leste.
Sekretáriu Estadu Floresta (SEF), Fernandino Vieira da Costa informa, komunidade sira la bele halo to’os arbiru de’it tanba halo to’os iha rai fuik ka ai-laran tuan ne’ebé la permanente bele fó impaktu ba animál fuik sira nia hela fatin.
Fernandino alerta ba sidadaun Timorense husi Tutuala to’o Oekusi, husi Betanu to’o fali Ataúru, agora atu tama iha klimátika bailoron, mai hamutuk hodi fó ida-idak nia kontribuisaun kuidadu ai-horis no balada fuik iha tempu bailoron naruk.
“Ita la bele sunu ai, la bele tesi ai arbiru, la bele kasa animál fuik sira ne’ebé iha rai laran tanba atividade ne’e, kontra bandu husi Governu liuliu iha SEF ne’ebé bandu komunidade la bele estraga rekursu floresta iha ita-nia rai,” SEF, Fernandino dehan iha Munísipiu Aileu, Segunda, 14/08/2023.
Nia afirma, kontribuisaun ba prosesu dezenvolvimentu iha Timor-Leste tenke partisipasaun husi ema hotu nian la’ós du’un de’it ba governu.
“Prosesu dezenvolvimentu la’ós de’it ba funsionáriu sira ne’ebé serbisu iha diresaun Floresta, maibé responsabilidade ita hotu nian, nu’udar sidadaun Timorense tenke asegura nafatin sustentabilidade dezenvolvimentu iha nasaun ida ne’e,” Nia hakotu.
Jornalista : Mariano Do Santos Abi
Editór : Orlando Magno
