(Aileu) Mudansa – Atividade projetu AFoCo 026/2021 iha Munisípiu Aileu postu administrativu Aileu Villa, Suku Fabir konklui ona konstrusaun lutu ne’ebé implementa husi Asian Forest Cooperation and Organixation (AFoCo) nu’udar organisasaun inter-governamentais no nonu Governu Konstitusionál.
Sekretáriu Estadu Floresta (SEF), Fernandino Vieira da Costa informa, Projetu AFoCo 026/2021 atu hametin kooperasaun, transformasaun teknólojia no polítika ho asaun konkreta iha jestaun floresta sustentavel ne’ebé halo iha 2022 Qt l1-Q-1V, kontinua kedas halo atualizasaun progesu projetu ne’e.
“Objetivu ha’u mak vizita Munísipiu Aileu atu haree projetu ne’ebé organisasaun AFoCo implementa iha postu administrativu Aileu Villa, hamutuk hektares 20 ho ninia natureza projetu ba natural nigenerasaun, ne’ebé agora finaliza ona konstrusaun lutu,” dehan SEF Fernandino iha resintu Diresaun Serbisu Agrikultura Munísipiu Aileu, Segunda, 14/08/2023.
Sekretáriu Estadu Fernandino Vieira haktuir, iha Munisípiu Aileu aprejenta husi Diretór Nasionál, Diretór Jerál no Diretór Munísipiu kona-ba serbisu ne’ebé atinje ona tuir tempu ne’ebé antes nee determina.
Fernandino Vieira afirma, progresu kona-ba projetu AFoCo 026/2021, implementa iha Munisípiu 2 Manatutu atinji ona 89%, no mós iha Aileu ba konstrusaun lutu finaliza tiha ona, nune’e oinsá AFoCo prepara tan ai oan bibeirus hodi bele kuda tan iha área hektares 20 ne’ebé preparadu ona.
Iha sorin seluk, Administradór Munisípiu Aileu, Abel da Conceição argumenta, ohin hetan vizita ofisiál husi nonu Governu liu husi SEF hodi mai observa direta implementasaun projetu AFoCo 026/2021.
“SEF mai haree ida ne’e, depois sei orienta teknikamente guarda floresta sira iha Munisípiu Aileu, atu haree no introdús polítika reflorestasaun iha ita-nia Munísipiu Aileu,” nia relata.
Nia aumenta, hanesan ema hotu hatene iha Munisípiu Aileu suporta bee, ai-horis sira ne’ebé hetan impaktu direta ba iha kapitál nasaun nian, entaun Munísipiu Aileu importante tebetebes atu dezenvolve área floresta.
“Ita oferese bee kapitál sidade Dili, nune’e bee matan sira iha Aileu, entaun área floresta ne’e importante iha Dili no mós Munísipiu Aileu,” nia akresenta.
Enkuantu, orsamentu ne’ebé utiliza ba projetu AFoCo nian hamutuk $.1.000.000.00 durasaun tempu durante tinan 3, agora SEF implementa ona tinan ida ho balu no prosesu ida ne’e tuir etapa.
No osan ida ne’e la’ós ba de’it konstrusaun, maibé sei liu husi faze, monitorizasaun husi Sekretáriu AFoCo nian kona-ba progresu serbisu ne’ebé hala’o iha Munisípiu sira ne’ebé sai ona tarzetu.
Jornalista : Mariano Do Santos Abi
Editór : Orlando Magno
