(Dili) Mudansa – Organizasaun Asian Forest Cooperation Organization (AFOCO) apoiu motorizada 3 ba Sekretária Estadu Floresta (SEF) liuliu iha projetu 026 ba atividade programa reflorestasaun ho naturál ba reneregasaun, ne’ebé hala’o iha Munisípiu Manatutu ho Aileu.
Diretór Nasionál Jestaun Floresta Bacias Hidrografíkas, Adolfredo do Rosario Pereira informa, apoiu Governu Timor-Leste, tanba Timor-Leste mós hanesan nasaun fundadór ida ba iha organizasaun AFOCO no mós iha organizasaun ne’e intergovernamentais ne’ebé kompostu husi nasaun 14.
Nia afirma, sira fahe atividade ne’e ba iha projetu AFOCO nian iha númeru 026, tanba antes ne’e Governu Timor-Leste iha tiha ona 018 no foin daudauk SEF iha tan projetu foun ida iha floresta naun- madeira nian hamutuk 035,”
“AFOCO apoiu projetu barak, ne’ebé ohin entrega motorizada ne’e hodi hala’o serbisu iha Munisípiu Manatutu ho Aileu ita halo reflorestasaun hahú iha tinan 2022 to’o 2026 hein katak kooperasaun ne’e kontinua, tanba Visse Diretór AFOCO mós haree, ita-nia atinjementu iha projetu ne’e kapás tebetebes,” dehan Diretór Adolfredo ba Jornalista hafoin entrega motorizada iha Floresta Travesa Rumbia Caicoli Vera Cruz, Kinta, 10/08/2023.
Iha sorin seluk, Sekretáriu Estadu Floresta (SEF), Fernandino Vieira da Costa agradese ba AFOCO lori Governu konstitusionál nia naran hato’o obrigadu ba AFOCO tanba apoiu ona fasilidade ba SEF no tulun tebetebes tékniku sira hodi hala’o serbisu iha terenu.
“Ita espera katak, apoiu ne’ebé fó mai la’ós de’it iha ne’e, maibé sei fó tan apoiu karreta 2 ba iha tinan ida ne’e hodi tulun ita-nia Governu Timor-Leste ba dezenvolvimentu iha setór refloresta nian,” Fernandino relata.
Nia hatutan, la’ós de’it apoiu matériais maibé SEF mós hakarak organizasaun AFOCO sei nafatin fasilita atu apoiu tékniku SEF ninian liuliu iha kapasitasaun rekursu umanu nune’e bele iha koñesimentu ne’ebé kle’an liu tan hodi dezenvolve setór refloresta nian.
Nia sujere, Fernandino husu ba tékniku na’in-3 ne’ebé simu motorizada ne’e, atu utiliza didi’ak ho responsabilidade hodi bele fasilita serbisu ne’ebé hanesan hala’o iha terenu.
“La bele konsidera apoiu ne’e hanesan estadu nian ne’ebé ita utiliza tuir ita-nia hakarak maibé tenke Kuidadu motór ne’e ho didi’ak hanesan kuidadu ita-nia isin lolon, hodi fasilita ita bainhira hala’o serbisu,” nia alerta.
Iha sorin Seluk, Fasilitadór Terrenu Bartolomeo de Jejus Soares argumenta, hanesan fasilitadór terenu sei utiliza transporte ne’e iha terenu liuliu iha atividade reflorestasaun no mós atividade sira iha Munisípiu Aileu ho Manatutu.
“Iha atividade sira ne’e, durante tinan 4 nia laran, ami sei utiliza iha tinan 2023 to’o 2026, ami nia serbisu nu’udar tékniku iha terenu, ami sei halo monitorizasaun no halo koordenasaun ho autoridade Munisípiu sira oinsá implementa atividade sira,” Bartolomeo hatete.
Enkuantu motorizada 3 ne’e sei hala’o atividade iha Munisípiu Aileu, Manatutu ho Dili no orsamentu ba motorizada 3 ne’e hamutuk $.5.000.00, iha ne’ebé motorizada hirak ne’e sosa iha Dili laran bazeia ba orsamentu husi organizasaun AFOCO nian.
Jornalista : Mariano Do Santos Abi
Editor : Orlando Magno
