(Dili) Mudansa – Sekretáriu Estadu Floresta (SEF), Fernandino Vieira da Costa kompromete katak, futuru oin mai guarda Floresta sei sai estensionista ba komunidade sira hodi sai na’in ba área ne’ebé protejidu iha Timor-Leste.
“Guarda Floresta la’ós de’it fó protesaun ba área Floresta, maibé aban bainrua sai estensionista, oinsá bele estensionista ne’ebé di’ak hodi bele fó konsiénsia ba ita-nia komunidade atu sai na’in ba área protejidu iha Timor-Leste,” SEF Fernandino dehan ba Jornalista sira hafoin entrega motorizada 3 ba tékniku na’in-3 iha Floresta Travesa Rumbia Kaicoli Vera Cruz, Kinta, 10/08/2023.
Nia afirma, ema hotu-hotu hatene, área Floresta hamutuk 58, porsentu ne’ebé kobre territóriu Timor laran tomak, oinsá ema hotu bele asegura, atu fó sustentabilidade ba dezenvolvimentu iha Timor-Leste.
Bainhira Floresta ladún di’ak ou hetan ameasa boot maka sei afeta ba nasaun nia infraestrutura sira ne’ebé SEF dezenvolve di’ak ona no mós ema hotu-hotu akompaña iha tempu udan oras, estrada sira kotu, ponte sira kotu, ne’e tanba rai risku duni ba dezastre naturais liuliu erozaun.
Aleinde ne’e mós polítika SEF ninian sei halo reflorestasaun iha fatin risku, foin daudauk iha fulan kotuk maka hetan ona aprovasaun programa setór floresta nian hamutuk 14, ne’ebé programa sira ne’e durante tinan 5, maibé husi programa 14 bele to’o sub-programa 20.
“Prioridade liu ba iha serbisu setór floresta maka ita sei dezenvolve no mós tau atensaun ba iha área risku dezastre naturais, área krítiku sira iha territóriu tomak no mós sei dezenvolve agro-floresta, fatin istoríku sira, eko-turizmu, área protejidu ne’ebé ita demarka ona hamutuk 46, hodi hasa’e ekonomia povu nian atu bele hatama reseita ba kofre estadu,” nia dehan.
Nia relata, SEF nia mehi oinsá povu bele iha mudansa, ba moris nune’e objetivu nasaun nian katak, ukun rasik an ne’e bele korresponde, se ukun an tiha ona maka povu sei nafatin iha mukit no susar nia laran, entaun nasaun la iha objetivu ne’ebé di’ak.
“Karik turista barak tama mai, ne’e normalmente bele hasa’e ita-nia ekonomia ba ita-nia povu ho ita-nia nasaun hodi sustenta mákina estadu nian,” nia hakotu.
Jornalista : Mariano Do Santos Abi
Editór : Orlando Magno
