(Dili) Mudansa – Liga ho Governu reativa fali Arte Marsiais tolu (3) hanesan Persaudaraan Setia Hatih Terate (PSHT) Ikatan Kerasakti Timor-leste (IKTL) no Kmanek Oan Rai Klaran (KORK), maibe lei nunka atu kondena Arte Marsiais.
Deputada Kmanek Haburas Unidade Nasionál Timor Oan (KHUNTO) Olinda Guterres Hateten, maske reativa tiha arte marsiais sira ne’e, maibé problema kontinua mosu no buras iha Dili laran, signifika ida ne’e lei fraku tanba nunka kondena Arte Marsiais.
“Ha’u hanoin implementasaun lei la forte tanba agora kontinua mosu problema hanesan baku malu iha fain-fatin, ne’ebé ha’u dehan lei la forte tanba lei nunka kondena arte marsiais sira ne’ebé gosta baku malu no gosta oho malu,” dehan Deputada Olinda Guterres ba jornalista iha resintu Parlamentu Nasionál (PN), Kuarta 09/08/2023.
Olinda haktuir, membru Arte Marsial ne’ebé hakarak buka mak problema ne’e haruka nia tama tiha Forsa Defeza Timor-Leste (F-FDTL) hodi hatais farda forsa nian kompletu haruka sira ba tiru malu iha nasaun Ukránia ho Rúsia ne’ebé funu hela ne’e, la bele halo fali problema iha ne’e hodi estraga fali Timor oan ho Timor oan.
Deputada afirma, Primeiru Ministru atuál Xanana Gusmão, Líder supremu Partidu KHUNTO, José Naimori Bukar ho Prezidente Partidu PLP, Taur Matan Ruak promete iha tempu kampaña ba joven sira ne’ebé tama Arte Marsiais katak, atu reativa Arte Marsiais 3 ne’e.
“Ne’ebé la sala kuandu bainhira reativa ona, sira mós tenke atensaun, la bele halo problema hela de’it, bainhira halo hela de’it problema mak Governu bele foti fali desizaun seluk,” Deputada ne’e dehan.
Aleinde ne’e mós deputada partidu KHUNTO ne’e fó ninia mensajen mós ba Arte Marsiais hanesan PSHT ne’ebé agora atu realiza sira nia graduasaun ba tinan 2023 labele halo problema hodi halo povu sira hakmatek.
“Saida mak imi-nia maun boot sira ko’alia ba imi ne’e rona no halo tuir, la bele halo problema iha sosiedade, tanba ita tuir Arte Marsiais atu kumpre doutrina ne’ebé ita simu husi ita-nia boot sira, bainhira ita boot sira simu tiha ona gradua ba halo problema ne’e ita boot sira nia maun boot sira mak naran fo’er,” nia hakotu.
Jornalista : Mariano Do Santos Abi
Editór : Orlando Magno
