(Dili) Mudansa – Sekretariu Estadu Protesaun Sivíl (SEPS) Mariano Reis informa, dadaun ne’e ekipa husi autoridade protesaun sivíl hahú halo atendimentu ba vítima afetadu inundasaun iha Munisípiu hamutuk lima (5).
“Inundasaun ne’ebé akontese iha munisípiu 5 hanesan Kovalima, Lautem, Bobonaro Manufahi no mós Ainaro, hirak ne’e agora autoridade protesaun sivíl halo ona intervensaun mais rápida,” dehan Mariano hodi hatán ba pergunta husi Media Mudansa iha Palásiu Governu, kuarta 05/07/2023.
Mariano hatete, provizoriamente udan boot iha loron 2-3/07/2023 ne’e mosu duni inundasaun iha munisípiu lima, maibé protesaun sivíl evakua ona vítima sira ba fatin seguru inklui mós fó asisténsia umanitária.
Nia hatutan, asisténsia umanitáriu ne’e apoia ba emerjénsia ninian iha Item rua ne’ebé agora to’o ona iha vítima sira-nia liman, no mós vítima sira hela provizóriu iha fatin seguru.
“Depois sei halo levantamentu ba dadus atu bele rekupera ba sira nia rezidénsia sira (abitante nia fatin). ha’u haruka ona autoridade protesaun sivíl iha nivel munisipál halo hela levantamentu dadus ho detallu, aban ka bainrua ita sei aprezenta mais detallu ba média sira,” katak nia.
Aleinde ne’e, Sekretariadu Estadu Protesaun Sivil rasik mós kontinua orienta prezidente autoridade protesaun sivíl iha munisípiu sira atu deskarega karreta rua ho ai-han hodi distribui ba vítima sira ne’ebé hetan inundasaun iha loron 4 abríl 2021 kada iha munisípiu sira.
Jornalista : Julião da Silva
Editór : Orlando Magno
