(Kovalima) Mudansa – horiseik 04/07/2023, lokraik tuku 4 ho balu akontesimentu dezastre naturais rai monu estraga komunidade nia uma kuaze 50 resin iha Zulo Knua Suku Zulo Postu Administrativu Zumalai munisípiu Kovalima.
Xefe Aldeia Lale Suku Zulo Celestino Barreto informa, Akontesimentu dezastre naturais rai monu kauza husi udan boot durante loron tolu.
“Iha ami nia bairru laran akontesimentu dezastre naturais, rai monu liu hektar ida resin no estraga komunidade nia uma kuaze 50 resin inklui estrada diresaun Zumalai Bobonaru mós hetan estragus,” dehan Xefe Aldeia Lale ba Media Mudansa hafoin akontesimentu ne’e mosu iha Zulo, Kovalima, kuarta 05/072023.
Celestino afirma, nia parte seidauk bele fó dadus lolos tanba halo identifikasaun ba vítima dezastre sira nia uma seidauk hotu.
“Agora ha’u seidauk bele fó dadus kompletu kona-ba uma hira mak hetan estragus, husi akontesimentu ne’e maibé ha’u bele fó dadus provizóriu hanesan ohin ha’u dehan ona,” nia deklara.
Husi akontesimentu ne’e Jornalista Media Mudansa haree katak, dadaun nee transporte la bele halo movimentu tanba estrada diresaun postu Zumalai ho Bobonaru hetan estragus husi dezastre naturain neebe mosu.
To’o notísia ne’e publika Jornalista Media mudansa tenta halo konfirmasaun ho Xefe suku no mós parte relevante liuliu Protesaun Sivil Munisipiu Kovalima maibé seidauk hetan resposta tanba okupadu hela ho asuntu importante balu.
Jornalista : MediaMudansa
Editór : Orlando Magno
