(Díli) Taibesi – Maske ho idade ne’ebé avansadu (77), Armando Magno kontinua halo negósiu suku sapatu iha estrada ninin, ne’ebé sai dalan importante hodi sustenta família no apoia oan sira nia eskola. Negósiu ne’e hahú iha tinan 2014, hatudu determinasaun hodi hadia moris loroloron nian.
Armando Magno orijin husi Postu Administrativo Hauba, Munisípiu Bobonaro, Aldeia Tasi Balu, no nia esposa, Luzia de Araujo, husi Munisípiu Ainaro, Maulu-1. Sira iha oan nain 9, kompostu husi mane haat no feto lima. Maski idade avansadu, Armando la iha alternativa renda, ne’ebé hala’o nia hatene atu hahú negósiu ki’ik hodi sustenta família no atende nesesidade loroloron.
“Ho inisiativa rasik, hau hahú negósiu suku sapatu iha estrada ninin hodi sustenta oan sira iha eskola no halo buat seluk ne’ebé hau presiza,” dehan Armando.
Nia hatete katak negósiu ne’e hahu tinan 2014 to’o agora, tanba la iha servisu seluk ne’ebé bele hetan rendimentu.
Armando hatete, hosi dolar 2 kada sapatu, loron ida bele to’o $15, depende ba ema kliente sira ne’ebé lori sapatu mai.
Nia hatudu katak idade la’ós impedimentu atu hala’o esforsu no halo diferensa ba oan sira. Negósiu suku sapatu iha estrada ne’e sai simbolu dedikasaun, kreatividade, no determinasaun hodi sustenta família no garante futuru oan sira.
Jornalista/Estajiadu : Milenio DC Maria
Editor :Felisberto F. da Costa
