Díli –Carme Borges hala’o negósiu ki’ik ho Aifunan hodi sustenta família no ajuda vizinhu sira iha komunidade. Maski enfrenta dezafiu oioin hanesan falta bee no rai metan, nia kontinua ho esforsu hodi garante rendimentu loron-loron no apoia edukasaun labarik sira.
Carme hatete katak moris tur deit iha uma la’ós dalan di’ak tanba ne’e nia hahú bibit Aifunan no sa husi 2008 to’o agora. Hosi inisiu nia uza nia osan rasik hodi sosa vazu, pastiku no bibit ai-funan.
“Husi fa’an ne’e, ha’u bele kontinua sosa material foun hodi dezenvolve negósiu ne’e” Nia hatete.
Atividade ne’e la’ós fó rendimentu deit, maibé mós hatudu solidariedade iha komunidade, tanba nia fahe Aifunan balu ba viziñu no família sira ne’ebé presiza.
Maski hatene benefisiu, Carme enfrenta dezafiu boot. Problema boot mak bee no rai metan. Iha tempu udan, be’e fasil atu hetan, maibé iha bailoron nia presiza lori be’e husi fatin dook hodi rega Aifunan.
“Kona-ba rai metan, ha’u tenke sosa ho presu 0,50 centavos kada karon 25kg, no bainhira presiza barak, presu bele to’o dolares amerikanu $10 ka liu tan” nia esplika.
Carme sustenta família boot, ho oan nain lima (feto rua no mane tolu). Husi rendimentu Aifunan, nia bele atende nesesidade loroloron, apoia eskola labarik sira, no mós responde ba kultura Timor nian. Iha semana balu, nia bele hetan rendimentu $10 to’o $20, maibé iha loron movimentu hanesan Sabadu no Domingu, vendas bele sae to’o $70 ka $80. Presu Aifunan sira varia entre $1 to’o $30, depende ba tipu no kualidade.
Maski enfrenta dezafiu, Carme tenke kontinua ho negósiu ida ne’e no aumenta variedade Aifunan sira. Nia esperansa katak atividade ne’e sai fonte regular ba sustenta família no mós kontribui ba komunidade. Istória Carme hatudu katak ho komitmentu no esforsu, negósiu ki’ik bele sai dalan ida importante hodi hadia moris loron-loron.
Negósiu ki’ik hanesan Aifunan laós deit fó rendimentu ba família, maibé mós kontribui ba solidariedade no moris komunidade. Istória ida ne’e serve hanesan inspirasaun ba ema seluk ne’ebé hakarak buka dalan atu hadia moris husi inisiativa ne’ebé simples.
Jornalista/Estjiadu : Timotio de Jesus
Editor :Felisberto F da Costa
