(Dili) Mudansa – Ekipa husi Ministériu Obras Públika (MOP) no Institutu Jestaun Ekipamentu (IGE-sigla portugés) dadaun ne’e tun ona ba terenu hodi identifika ponte sira ne’ebé hetan estragu no kotu nune’e bele buka dalan alternativa ruma hodi normaliza.
“Ekipa IJE ho Obras Pùblika iha Munisipiu hotu-hotu tun tiha ona ba terenu horiseik kedan, identifika ba ponte sira ne’ebé kotu, sira hahú ona atu buka dalan alternativu temporariamente hodi halo oinsá ita bele tau orsamentu hodi hadi’a fali ponte sira ne’e,” dehan Ministru Obras Públika Samuel Marçal ba jornalista hafoin partisipa iha reuniaun Konsellu Ministru, iha Palasiu Governu, tersa 04/07/2023.
Nia dehan, kona-ba kestaun ponte, ekipa identifika ona balun, hanesan ponte ida iha Lospalos, maski la’os kotu, maibé kuaze atu monu sai, ida ne’e tenke antisipa, no mós iha Suai ne’e ponte kotu iha parte hira kedan, inklui iha Ainaru mós rai halai.
“Buat sira ne’e hotu, balun karreta sei bele liu, balun karreta labele liu hanesan iha Same, ne’e ita haruka ona Obras Publika iha munisípiu ho IJE ba halo dalan alternativu para bele asesu fali,”Afirma nia.
Portantu, mezmu Programa governu da sia iha loron 120 ne’e aban mak diskute, maibé depois semana ida ne’e debate orsamentu hotu tiha, nia rasik sei ba vizita iha munisípiu hotu-hotu hodi haree projetu ne’ebé la’o laiha kontratu, balun paradu no abandonadu hela.
Maibé kona-ba estrada at iha Dili laran, governu mós rekoñese tanba mandatu governu da sia foin tama mai, entaun sei tun ba identifika buat sira ne’e hotu, inklui ponte Bekuse sei tau hotu iha programa tinan 2024.
Jornalista : Julião da Silva
Editór : Orlando Magno
