(Dili) Mudansa – Ministru Justisa (MJ) Amândio Benevides informa, sira nia parte sei prevee alokasaun Orsamentu ba produsaun kaderneta pasaporte nian iha Proposta Orsamentu Jerál Estadu (OJE) retifikativu tinan 2023.
“Enfelismente tempu ne’ebá la iha orsamentu ne’ebé tau atu bele prodús pasaporte, iha hela situasaun ida ne’ebé difisil hela, tanba buat sira ne’e tenke iha orsamentu, agora governu koko atu tau iha OJE retifikativu 2023 nian,”dehan Amândio hafoin partisipa iha reuniaun Konsellu Ministru (KM), tersa 04/07/2023.
Tanba tuir nia, problema pasaporte ne’e tempu liubá, parese falla atu haree durasaun kontratu entaun kontratu mate tiha iha tinan hira liubá hafoin COVID-19, ema la sai tanba ema ladún tau importánsia maibé COVID-19 laiha ona, ema barak hakarak sai ba rai li’ur.
“Tempu ne’ebá iha hela kadernetas ne’ebé mamuk barak, maibé tanba ema hotu-hotu hakarak iha pasaporte, entaun previzaun ida ne’ebé iha Ministériu liuliu Diresaun Jerál Rejistu Notariadu prepara hela atu bele atende nesesidade ful-fulan, 15 míl até 25 míl ne’ebé previzaun atu to’o iha 2023 ne’e hotu tiha fali iha 2022,”katak nia.
Ministru Amândio hatete, kona-ba Bilete Identidade Pasaporte ne’e dokumentu ida ne’ebé esensiál kona-ba dadus pesoál, no mós iha sistema seguransa rasik, ema balun hanoin katak pasaporte ne’e bele halo de’it iha munisípiu maibé labele tanba ida ne’e pasaporte.
“Bilete Identidade ne’e bele, maibé pasaporte ne’e dokumentu ida ne’ebé importante tebetebes, dala ruma espasu ita nian diresaun sira ne’ebé atu atende ne’e mak ki’ik,” haktuir nia.
Tanba ne’e, nia dehan Ministeriu Justisa rasik mós hanoin hela atu iha tempu mai tenke halo planu ida di’ak hodi haree espasu ka regra ruma kona-ba trata sidadaun sira nia pasaporte.
“Bele regulariza tempu saida mak ema bele ba, atu nune’e bele fó oportunidade atu ema ba trata dokumentus iha loron saida, bainhira ema hotu ba iha loron ida de’it mós bele ema nakonu liu tan, entaun ita sei haree tanba ida ne’e hanesan dezafiu ida ba governasaun liuliu iha Ministériu Justisa atu bele buka esforsu ho meius rasik hodi fó konfortável ba ema ne’ebé ba trata dokumentu,” nia salienta.
Jornalista : Julião da Silva
Editor : Orlando Magno
