(Dili) Mudansa – Sekretariu Estadu Protesaun Sivil (SEPS) sesante Joaquim Gusmão husu deskulpa ba vítima dezastre sira ne’ebé seidauk hetan apoiu maibé nia fiar governu foun sei kontinua haree asuntu ne’e tanba nia parte aprezenta ona relatóriu no mós hato’o rekomendasaun ba SEPS foun.
SEPS sesante Joaquim informa, Hanesan Sekretariu Estadu Protesaun Sivil uitavu governu nian ohin remata ona servisu hodi entrega fali ba Serkretariu Estadu Protesaun Sivil foun.
“Karik Vitima dezastre seidauk hetan apoiu emerjénsia, hahán no mós seidauk hetan apoiu rekuperasaun husi Protesaun Sivil ha’u husu deskulpa maibé hirak ne’e hotu hato’o ona ba SEPS foun ba estrutura Autoridade protesaun Sivil atu kontinua halo kompleta vítima ne’ebé seidauk hetan apoiu,” dehan Eis SEPS Joaquim ba jornalista iha edifísiu SEPS Kaikoli Dili, segunda 03/07/2023.
Joaquim afirma, nia la iha liafuan seluk maibé hakarak hato’o de’it agradesimentu boot ba ema hotu nia apoiu servisu tomak durante mandatu iha tinan tolu nia laran.
“Hau Agradese ba maromak, funsionáriu no mós Prezidente Autoridade Protesaun Sivil ho funsionáriu sira hotu, Komandante Operasional, Diretor Nasionais sira, xefe Departamentu iha Autoridade protesaun sivíl nia okos,” nia tenik.
Nia akresenta, la haluha mós agradesimentu ba parseiru sira hotu ne’ebé la temi ida por ida tanba sempre apoiu no suporta bainhira akontesimentu dezastre boot iha rai laran.
“Hau nia agradesimentu espesiál ba jornalista sira ne’ebé sempre fó apoiu SEPS liu husi divulga informasaun tanba ita boot sira sempre halo kooperasaun di’ak no mós hato’o informasaun di’ak ba públiku hodi fó hanoin beibeik ita-nia komunidade sira ne’ebé hela iha área risku,” Joaquim apresia.
Jornalista : Ekipa MediaMudansa
Editór : Orlando Magno
