(Dili) Mudansa – Vise ministru Interior (VMI) Sesante Antonio Armindo aprezenta relatóriu servisu durante ninia mandatu no mós hato’o rekomendasaun ba Ministru Interior Foun Francisco Guterres oinsá atu kontinua servisu balu ne’ebé governu anteriór la konsege finaliza.
“Ohin rekomendasaun lubuk ida balu sensitivu, bele ko’alia hamutuk ho diresaun sira hanesan oinsá bele kontinua rekomendasaun kuaze 40 bazeia ba realidade ne’ebé ita hasoru durante tinan rua ka tolu nia laran,” dehan Eis VMI Antonio Armindo ba jornalista hafoin remata entrega relatóriu iha ministériu Interior Vila-Verde Dili, 03/07/2023.
Antonio esplika, rekrutamentu ba membru Polisia sai mós rekomendasaun ba ministru foun, tuir fali maka oinsá atu kontinua kolabora nafatin ho parseiru internasionál ne’ebé servisu hamutuk ho ministériu interiór, PNTL, Protesaun Sivil no mós imigrasaun.
“Ohin ami aprezenta mós ba Ministru Interior katak, iha parseiru balu sei apoiu ró no mós karreta ba ita-nia Polisia Marítima,” nia relata.
Antonio afirma, nia parte hato’o mós relatóriu Kona-ba komandu munisípiu to’o nasionál ba Ministru Interior Foun katak dezeñu foun protótipu ne’ebé aplika de’it ba Eskuadra hotu hotu iha Timor-Leste hanesan mós Eskuadra Dom Aleixo nian.
Nia realsa, Aproveita biban Antonio Armindo hato’o agradese ba Diretores iha Diresaun sira hotu, Komandante no membru polísia, Ekipa Servisu Migrasaun no mós Protesaun Sivil ne’ebé durante ne’e fó ona sira nia apoiu ba governu anteriór.
“Ami nia mandatu sai kmaan tanba servisu hamutuk no mós sira nia kontribuisaun importante loos,” nia deklara.
Vise Ministru Interior sesante Antonio Armindo hato’o parabéns ba Komandu ne’ebé servisu di’ak hatudu sira nia maturidade no profisionalizmu no aproveita.
“Lori Ministru Interior sesante nia naran no ha’u-nia an rasik hakarak hato’o agradese ba Komandu Jerál no mós ba média sira hotu liuliu ba jornalista sira ne’ebé sempre fó sai informasaun kona-ba parte seguransa nian,” Eis VMI Apresia.
Iha fatin hanesan Ministru Interior foun Francisco Guteres tenik, Ohin kontinuidade servisu balu maibé sira mós iha planu prioridade lubuk boot mak hatuur hela nune’e durante loron 120 ne’e, saida mak presiza halo tenke hotu.
Nia akresenta, seidauk lee relatóriu husi Vise ministru Interior Sesante maibé ohin Eis VMI fó hatene ona iha kestaun Infraestruturas, polítika, Operasionais, inklui mós kestaun husi Protesaun Sivil.
“Ami mai iha ne’e atu kontinua hala’o servisu hodi buka solusoens oinsá bele rezolve problema hirak ne’ebé parte seguransa hasoru nune’e bele garante setór seguransa forte liu tan Hodi apoiu ba dezenvolvimentu nasionál ida ne’e mak importante,” MI Francisco hatete.
Jornalista : Ekipa MediaMudansa
Editór : Orlando Magno
