(Dili) Mudansa – Ministra Edukasaun Dulce Soares hateten,sei halo avaliasaun ba professores voluntáriu sira hotu ko’alia kona ba Edukasaun la’os númeru professores, maibé kualidades professores mak importante liu.
“Professor voluntáriu sira ne’e hotu, sei avalia fila fali hodi haree prienxe kualifikasaun ka lae? tanba ko’alia kona ba edukasaun la’os númeru professores, maibé kualidade professores ida ne’e mak importante liu,” Dehan Ministra Edukasaun Dulce Soares ba jornalista sira iha ME Vila-Verde Dili Segunda, (03/07/23).
Ministra Dulce afirma, Iha tinan 2015 la’os Timor-Leste menus professores, maibé presiza halo jestaun ida di’ak atu garante eskola hotu iha nivel ensinu sira hotu iha professores.
“Ita-nia problema la’os aumenta professores, ka atu distribui,maibé atu haree sira nia kualidade, la’os ba foti ema hotu mai tau iha Edukasaun,” nia relata.
Dulce hateten, Ministeriu Edukasaun atu hakat ba oin tenke envolve oan sira remata ona Universidade iha rai laran no rai li’ur.
“Sira ne’ebé iha kualifikasaun, Ministeriu Edukasaun hakarak atu hatama hodi haforsa Ministeriu Edukasaun ida ne’e maka dehan kualidade Edukasaun mai husi baze,” Nia subliña
Nia esplika, Antes ne’e halo ona kuadru pesoál presiza professores matemátika hira, Professores Biologia hira, tuir disiplina hirak ne’e dadus tinan 2020 iha ona.
“Agora hatama professores sira bazeia ba kuadru pesoál ne’ebé ami prepara ka iha kuadru pesoál foun,” nia deklara.
Iha fatin hanesan Ministeriu Edukasaun Sesante Armindo Maia argumenta, kona-ba professores voluntáriu etapa daruak nian hamutuk 530 maka seidauk halo verifikasaun, tanba seidauk iha dokumentus ne’ebé kompleta liuliu iha munisípiu Manufahi.
“Professores presiza kondisaun ne’ebé sufisiente saláriu no subsídiu balu ne’e importante, no mós professores hamutuk 1.715 ne’ebé asina ona parte Komisaun Funsaun Publika sei hare sira nia profile husi ami laiha problema professores husi kontratadu ba permanente no rejime espesiál.” Nia hakotu
Jornalista : Delfina Borges
Editór : Orlando Magno
