(Dili) Mudansa – Ministru Administrasaun Estatal (MAE) Tomas Cabral konsidera informasaun kona-ba hapara funsionáriu Kontratadu iha Ministériu Administrasaun Estatál hamutuk 800 ne’e hoax tanba to’o agora seidauk iha desizaun ruma ba asuntu ne’e.
“Ami seidauk halo desizaun, ami sei diskute programa, informasaun ne’ebé espalla iha média sosiál ne’e sira mak hakarak halo propaganda hodi fahe informasaun falsu ba públiku,”dehan ministru Tomas iha palásiu governu, kuarta 05/07/2023.
Nia hatutan, informasaun espalla iha média sosiál dehan Ministru Tomas Cabrál no Jacinto Rigoberto hasai funsionáriu kazuais hamutuk 800 resin aumenta dezempregu iha Timor-Leste, ida ne’e husu ba Diretor sira iha MAE ne’ebé halo prosesu ne’e.
Tanba tuir nia, funsionáriu iha kategoria rua ne’ebé lei regula, mak funsionáriu públiku no ida seluk ne’e funsionáriu kazuais atu fó apoiu tanba formasaun governu mai husi partidu entaun sira ba hanesan apoiu polítiku.
Nia deklara, Tuir Regras mandatu hotu tenke para, iha funsionáriu do estadu, iha kazuais, Kazuais ne’e regula ho lei, rekruta por méritu ne’e buat seluk ida, maibé apoitmant ne’e, nia mandatu hotu, hotu ona problema iha ne’ebé?
“Ha’u ba servisu ho Prezidente Republika Jose Horta ne’e, reprezentasaun maibé nia fó kontratu ida ba ha’u, entaun ha’u-nia kontratu remata tiha iha 30 de juñu 2023, se ha’u la ba membru do governu karik, hein nia bolu ha’u mak ha’u ba,”katak nia.
Jornalista : Julião da Silva
Editór : Orlando Magno
