(Dili) Mudansa – Sente an katak joven ne’ebé forte no bonitu ka bonita, Labele tane beibeik lima ba família sira hodi husu osan tanba futuru harii uma kain ema ida-idak sei responsabilidade ba nia an la’ós ema seluk.
Idade joven tenke hahú ona agora aprende buka osan hodi sustenta morin independente (mandiri) maka arrepende sei la mosu bainhira harii uma kain iha loron tuir mai.
Tanba ne’e, Negosiante Ernesto Fernandes nu’udar foin-sa’e ida lakohi dependénsia ba ema ida maibé hakarak esforsu an hodi suporta ninia estudu ho hakmaan família liuliu inan-aman nia todan ne’ebé durante ne’e sira halo ba oan sira.
Negosiante Ernesto Fernades informa, nia parte iha inisiativa fa’an pulsa no sigarru tanba, hakarak selu rasik ninia estudu ne’ebé dadaun ne’e nia hala’o hela iha Universidade da Paz (UNPAZ).
“Hau eskola iha UNPAZ foti Fakuldade Saude Publik Departamentu Nutrisaun, maibé ha’u fahe oras balun hodi fa’an sigarru no pulsa nune’e bele garante osan mina motór no mós osan bemo nian, hodi bele hakmaan família Sira ne’ebé durante ne’e suporta hela ha’u estudu,”dehan Ernestu ba Media Mudansa iha Rotunda Nicolao Lobatu Komoro Dili, kuarta, 05/07/2023.
Nia afirma, husi inísiu Ernesto sosa pulsa no mós sigarru hanesan, Suria slop ida folin $.19.00, Marlboro $.27,50 no mós nia sosa sigarru L.A slop ida ho folin $. 22,50, aleinde ne’e, nia fa’an fali, Suria masu ida $.2,75, L.A 2,50, no mós sigarru Marlboro masu ida nia fa’an ho folin $.3.650.
“Osan ne’ebé ha’u sosa sigarru primeiru hetan suporta husi ha’u-nia Pai ho Mae fó osan hamutuk $.80.00 husi osan ne’e mak ha’u halo fali negósiu ki’ik hodi evita hahalok dependénsia,” nia relata.
Vikeke oan ne’e esplika, ba maluk foin sa’e sira tenke iha prinsípiu ida nu’udar joven tenke iha ona hanoin ida ne’ebé atu fó ksolok nia an no mós família.
Ernesto katak, joven sira, para ona ho hanoin ne’ebé nakonu ho hahalok krime hodi hamosu konflitu tanba agora la’ós ona tempu atu tau ódiu ba malu maibé nu’udar joven tenke fó liman ba malu hamutuk harii dame no hametin unidade hodi ba dezenvolvimentu iha Timor-Leste.
“Hau husu ba parte relevante Sira liuliu ba governu da IX atu tau importánsia liu sira ne’ebé iha interese atu kontinua estudu, tanba dala barak iha ema balun hakarak atu kontinua estudu iha universidade maibé kbiit la to’o,” nia rekomenda.
Ernesto Fernandes orijen husi aldeia Matau suku Besoru postu administrativu Watulari munisípiu Viqueque agora hela iha Kampung Baru Dili.
Estajiadu : Zemidonio Martins
Editór : Orlando Magno
