(Dili) Mudansa – Prezidente Repúblika (PR) José Ramos Horta deside ezonera Ajuntu- Xefe Kaza Militár, Superintendente João dos Reis Belo, hodi manifesta ninia karreira foun ne’ebé sei tama iha lista promosaun ba postu superiór sira iha tinan 2023 atu bele hadi’a di’ak liután ninia profisionalizmu.
Relasiona ho asuntu ne’e, maka Prezidente Republika rasik hasai ona despaixu tuir dekretu Prezidente Repúblika, númeru 59/23 de 29 de Jullu, iha númeru 3, artigu 26, Lei Orgánika Prezidénsia Repúblika, Lei númeru 3/201 de 1 de Juñu fó sai mós komunikadu liuhusi ninia gabinete iha Palásiu Prezidensiál Nicolau Lobato, Kinta 5/07/2023.
Tuir Komunikadu ne’ebé média mudansa asesu husi gabinete PR katak dadaun ne’e, Prezidente Repúblika, José Ramos-Horta, ezonera ona Ajuntu- Xefe Kaza Militár, Superintendente João dos Reis Belo, tanba konsidera katak, integra iha lista promosaun ba postu superiór no manifesta ninia interese atu hadi’a karreira profisionál.
“Xefe Estadu mós konsidera mós númeru elementu husi Polísia Nasional Timor-Leste (PNTL) ne’ebé mak tinan ne’e, sei tama iha situasaun aprezentasaun, hafoin ida ne’e, liuhosi dekretu Prezidente Repúblika, númeru 60/2023 no bazeia ba Lei Orgánika Prezidénsia Repúblika, Xefe Estadu nomeia Superentidente-Assistente Luís Barreto Soares ba Adjuntu-Xefe Kaza Militar Prezidénsia Repúblika nian,” dehan Horta liuhusi komunikadu imprensa.
Antes ne’e, Adjuntu- Xefe Kaza Militar asumi knaar hanesan Adjuntu Diretor-Jerál Servisu Migrasaun husi tinan 2009 to’o 2016, sai mós Komandante ba Sektor Permanente Estranjeiru husi tinan 2016 to’o 2019, no mós Adidu Migrasaun Timor-Leste nian iha Indonézia hahú husi tinan 2019 to’o 2020 no iha inan 2023, okupa temporariamente Komandu ba Pessoál no Formasaun.
Superentidente-Assistente Luís Barreto Soares doutoradu iha área Direitu husi Universidade Udayana Bali no mós hetan formasaun oioin iha área investigasaun kriminál, exploitasaun seksuál, tráfiku umanu, lideransa no demokratizasaun.
Jornalista : Julião da Silva
Editór : Orlando Magno
