(Dili) Mudansa – Primeiru Ministru (PM) Kay Rala Xanana Gusmão hamonu matan-been iha ámbitu debate loron daruak nian ba programa husi nonu governu konstitusionál tanba primeira vés Programa governu hetan konfiansa ho unanimidade sem votasaun husi deputadu sira iha Parlamentu Nasionál (PN).
Relasiona ho konfiansa ne’e, Primeiru Ministru Kay Rala Xanana Gusmão informa, konfiansa ne’ebé fó husi bankada parlamentár hotu-hotu, ne’e hanesan maturidade polítika ida ba joven sira liuliu sosiedade sira atu bele banati tuir.
“Ita-bo’ot sira iha ne’e hamutuk ho ami ita reafirma estadu direitu demokrátiku, ida-idak ho ninia funsaun ne’ebé konstituisaun fó, mandatu ne’ebé povu fó mai ita-nia hanoin ba ida de’it, atu serví rai ida ne’e,” Xanana deklara ho matan-been iha plenária PN, kuarta 19/07/2023.
Xanana akresenta, nu’udar katuas ida, tenke hatudu, ezemplu ida ne’e, ba nafatin iha rai Timor mak povu ida ne’e, sei la’o ba oin.
“Ne’e duni ohin ha’u dehan tiha ona, dezde 2007 to’o 2015, primeira vés mak ha’u mai fali iha ne’e, no primeira vés mak debate iha Parlamentu, bele hatudu katak ita komesa ona hanorin ita-nia joven sira no ita-nia sosiedade ba maturidade polítika ida-ne’e,” nia deklara.
Tuir nia, dala barak ona mai iha uma fukun ida ne’e no ohin bele dehan tempu ne’ebé la’o dadaun iha konstrusaun estadu ho nasaun no mós difikuldade barak, estadu ultrapasa ona, to’o agora povu bele fiar nafatin katak, reformasaun ba estadu diretu demokrátiku, tenke mai husi membru parlamentu no membru governu sira.
Nune’e, bankada opozisaun ka bankada parlamentár sai amigu ba malu tanba povu mak halo sira hamutuk, no hamutuk iha hanoin, tanba ne’e Primeiru Ministru, Xanana lori governu nia naran apresia ba deputadu sira, maski halo krítika maka’as maibé kritika ne’ebé ho konstrutivu tebetebes.
“Ha’u hakarak deklara iha ne’e katak governu retira nia pedidu votu do konfiansa tanba imi fó tiha ona, Imi-nia liafuan vale liu surat tahan ida,”Xanana hakilar ho matan ben.
Fatin hanesan Prezidente PN Maria Fernanda Lai lori kompozisaun meza PN hato’o Agradesimentu ba bankada parlamentares hotu, tanba konsege halo debate ba programa nonu governu ho pasífiku no konstrutivu, maski iha diferensiál ideia maibé iha objetivu komún maka bem estar ba povu Timór.
Tanba Timor-Leste nu’udar rai ida foin iha faze konstrusaun ne’ebé rezultadu auditoria mak kurizi erru ezekusaun orsamentu nune’e iha futuru atu labele repete erru hirak ne’e.
“Ita remata sesaun ida ne’e ho kontente no lágrimas maibé ita hotu hein servisu governu ninian, ita la vota tanba votu konfiansa retira ne’ebé ita la vota e aklamasaun por unanimidade das bankada parlamentáres,”nia esklarese tan.
Portantu programa hirak ne’ebé PM Xanana aprezenta ba Parlamentu, iha programa komprimisu prinsipál 6 mak hanesan; Reafirma filafali estadu diretu demokrátiku, daruak dezenvolve Kapital Sosial, datoluk dezenvolve infraestrutura sira, Da-haat dezenvolve ekonomia, Da-limak konsolida governasaun, da neen Promove boa Governasaun no kombate korrupsaun.
Jornalista : Julião da Silva
Editór : Orlando Magno
