(Dili) Mudansa – Asosiasaun Jornalista Timor Lorosa’e (AJTL) serbisu hamutuk ho Moonshot hanesan kompañia verifika faktus iha Inglatera Reinu Unidus ne’ebé halo treinamentu ba Jornalista, no mós estudante sira oinsá halo analiza ba propaganda falsu ne’ebé espalla iha plataforma dijitál.
“Sira ne’e aprende kona-ba oinsá mak verifika propaganda falsu no analiza informasaun iha Media Sosial hodi hatene katak, informasaun ne’e loos ou lae?” dehan Prezidente AJTL ba Media Mudansa iha Tower Fatuhada Dili, 24/07/2023.
Nia relata, atu halo verifikasaun informasaun falsu ne’e la bele Jornalista de’it, maibé kolaborasaun ne’e importante, ida ne’e mak objetivu husi AJTL hodi hasa’e kapasidade Jornalista sira nian.
“Ita iha ona treinamentu barak, maibé tenke kontinua beibeik hodi nune’e bele abitua ho verifika informasaun falsu sira ne’e, tanba hanesan mós husi sira nia peskiza halo katak, ema hahú la fiar ona serbisu Jornalista nian,” nia deklara.
Enkuantu kona-ba kontinuasaun ba iha verifikasaun sira ne’e, sei halo tinan ida, la’os treinamentu de’it, maibé sei iha atividade sira seluk ne’ebé mak kolabora ho Governu liuliu SEKOMS maibé presiza aprosima mós ho Konsellu Imprensa (KI).
“Oinsá kompañia Moonshot ho Chek Fact Indonézia no mós Blackdout husi Singapura oinsá kolabora hamutuk hodi dezeñu livru kurríkulu ida halo kampaña ou advokasia iha média literasia ba iha nivel hotu-hotu, ida ne’e mak ita sei halo,” nia esplika.
Iha fatin hanesan partisipante husi média Citigen Jornalista, Deonisia Tilman dos Reis espresa sentimentu haksolok tanba workshop ida ne’e hanesan oportunidade di’ak ida, atu aumenta liu tan koñesimentu oinsá atu kombate informasaun hoax iha sosiedade nia leet.
“Informasaun ne’ebé ha’u akapta maka Jornalista atu kombate Fake News, ida ne’e interesante liu mai ha’u oinsá atu hatene informasaun ne’ebé espalla iha era dijitál nian, liuliu iha Facebook,” nia afirma
Nia tenik, nu’udar joven no Jornalista ida hakarak kombate Fake News tanba iha sosiedade nia leet suporta liu Fake News ne’ebé espalla iha média sosiál.
“Sujere ba AJTL, karik iha futuru AJTL presiza fó formasaun barak liu tan ba Jornalista sira, tanba ida ne’e importante ba maluk Jornalista sira hodi oinsá bele hamenus informasaun hoax iha komunidade sira nia leet,” nia rekomenda.
Aleinde partisipasaun iha workshop ne’e hamutuk na’in-15 mai husi instituisaun oin-oin inklui Jornalista sira ho estudante UNTL hodi hasa’e sira nia koñesimentu.
Jornalista : Mariano Do Santos Abi
Editór : Orlando Magno
