(Dili) Mudansa – United Nations Children’s Fund (UNICEF) iha Timor-Leste hamutuk ho Minísteriu Edukasaun (ME) abertura workshop ba programa South East Asia, Primary Learning Metric (SEA-PLM). Atu hadi’a aprendizajen fundamentál estudante sira nian iha Timor-Leste,
Reprezentante UNICEF iha Timor-Leste, Bilal Aurang Zeb Durrani, estratéjia ou xave ba SEA PLM mak avaliasaun rejionál foka liu ba rezultadu aprendizajen estudante sira nian iha klase lima, tanba programa ida ne’e iha pillar tolu (3).
Primeiru jeneraliza dadus komparasaun indikadór no analiza kona-ba rezultadu aprendizajen, kontestu iha edukasaun báziku liu husi observasaun sira no estudu sira seluk, segundu haforsa kolaborasaun atu hadi’a sistema ho polítika iha nivel eskola iha prátika edukasaun báziku.
Terseiru promove no hadi’a kapasidade tékniku, utiliza evidénsia husi observasaun SEA PLM ho estudu sira seluk kona-ba rezultadu aprendizajen no kontestu iha edukasaun báziku.
“SEA-PLM kualidade aprendizajen to’o ba labarik sira hotu, ne’e duni ha’u fó parabéns ba IX Governu konstitusionál ne’ebé nia desizaun ba tinan 2024, marka momentu krítiku hodi hadi’a kualidade aprendizajen no polítika relevante sira iha Timor,” Bilal Aurang Zeb Durrani, dehan liu husi nia diskursu iha serimónia abertura workshop SEA-PLM iha Ótel JL Villa Fatuhada, Segunda 24/07/2023.
Nia relata, suporta sira atu halo monitorizasaun rezultadu aprendizajen, nune’e atu dezenvolve polítika sira hodi bele kontribui ba edukasaun ida ne’ebé ekuitavel no signifikativu ba labarik sira iha rejiaun hotu.
Bilal Aurang Zeb Durrani, sente kontente tebes ba workshop SEA-PLM, tanba momentu ida ne’e hanesan hasoru malu ofisiál no tau konfiansa iha diskusaun iha workshop refere no sei oferese pasu ba futuru interasaun.
“SEA-PLM programa ne’ebé iha sudeste Asiatiku atu hadi’a aprendizajen fundamentál estudante sira nian, hodi dezenvolve sistema avaliasaun aprendizajen ne’ebé forte,” nia esplika.
Bilal konta, avaliasaun SEA-PLM dahuluk hala’o iha tinan 2019 ne’ebé Timor-Leste seidauk hola parte iha avaliasaun refere, maibé iha tinan 2022 Governu Timor-Leste iha komitmentu hodi hola parte iha SEA PLM tuir mai, ne’ebé mak sei hala’o iha tinan 2024.
“Ita-nia partisipasaun maka oportunidade exelente hodi promove entre nasaun no kolaborasaun ho SMEO no ASEAN. Ha’u mós atu hatete, membru balu partisipa ona formasaun iha Tailandia, Filipina ho Vietname nune’e mós hala’o ona vizita estudu iha ne’e,” Bilal Aurang Zeb Durrani, afirma.
Iha fatin hanesan, Diretór Jerál Minísteriu Edukasaun, Raimundu Jose Neto argumenta, iha fulan Juñu tinan 2022 Timor-Leste ho komitmentu ofisialmente hola parte iha avaliasaun SEA-PLM ba iha tinan 2024 ho ida ne’e ME iha komitmentu atu lori programa ida ne’e ba oin.
“Rezultadu husi Rede Assessment iha 2017 hatudu ona mais/menus porsentu 70 husi estudante grau primeiru ho pontuasaun skor 0, ne’e hatudu ba ita katak fó ona alarme ida ba ME,” Diretór Jerál Minísteriu Edukasaun, Raimundu Jose Neto informa.
Raimundu konsidera programa ne’e importante tebes ba nasaun ida ne’e, atu partisipa iha eskola boot internasionál no rejionál kona-ba avaliasaun estudante sira nian, hodi komprende.
“Ligadu ho prosesu aprendizajen estudante sira utiliza data ida ne’e atu informa ba polítika sira kona-ba oinsá partisipasaun SEA-PLM tinan 2024 nu’udar pasu importante hodi atinji meta no prioridade,” nia esplika.
Raimundo akresenta, avaliasaun aprendizajen husi SEA-PLM bele akumula data ne’ebé mak importante atu fasilita tomada desizaun polítika edukasaun no implementadór sira hodi mellora rezultadu aprendizajen.
“Tanba ne’e ME husu ba Vokál Point Nasionál atu koordena ho diretór tutela sira hodi implementa atividade importante inklui feal treal no meu surfey iha tinan 2024, nune’e mós ME husu Sekretáriu SEA, PLM hodi halo planu ba implementasaun SEA, PLM iha tinan tuir mai ne’e,” nia hakotu.
Jornalista : Mariano Do Santos Abi
Editor : Orlando Magno
