(Kovalima) Mudansa – Relasiona ho akontesimentu erozaun iha, loron 04/07/2023 iha Zulo Kanua, Suku Zulo, Postu Administrativu Zumalai, Munisípiu Kovalima, maski hetan kedas apoiu husi Sekretariu Estadu Protesaun Sivil (SEPS), maibe autoridade lokal suku Zulo konsidera la justu tanba vitima deszastre balu la hetan apoiu emerjensia rekuperasaun material Konstrusaun.
Xefe suku Zulo João Lopes Carvalho hato’o lamentasaun ne’e hafoin ekipa SEPS halo apoiu emerjénsia ba vítima hamutuk uma kain 62 maibé uma kain 57 mak hetan apoiu no vítima deszastre uma kain 5 iha suku Zulo, la hetan apoiu maski uma ne’e hetan estragus totál husi erozaun.
Informasaun ne’ebé Média Mudansa halibur husi Xefe Suku Zulo, João Lopes de Carvalho katak, Komunidade iha Suku Zulo totál uma kain 164 no populasaun hamutuk 520, maibé uma ne’ebé hetan estragus hamutuk 62 maibe balu hetan ona apoiu no balu seidauk hetan apoiu material konstrusaun.
“Tuir ha’u nia haree, SEPS foti dadus komunidade suku Zulo nian la justu, se loloos ajuda emerjénsia umanitaria ne’e vítima sira bele hetan hotu, tanba afetadu makaas ne’e uma kain hamutuk 62, maibé SEPS foti de’it dadus ba uma kain 57 mak hetan apoiu rekooperasaun,” dehan Xefe Suku via mensajen whatsapp, segunda 17/07/2023.
Hatan ba preokupasaun ne’e, Xefe Gabinete Relasaun Externa Komunikasaun Autoridade Protesaun Sivíl (APC), Anacleto Caetano klarifika, kona-ba asuntu nee nia parte simu ona kantaktu husi komunidade afetadu sira, ne’ebé buat ne’e la’ós husi APC lae, maibé serbisu hamutuk ho autoridade lokál sira.
Anacleto Caetano klarifika, ba uma lisan sira ne’ebé hetan afetadu, la hetan apoiu husi APC tanba tuir dekretu lei númeru 7/2021 liu-liu ba artigu 9 ko’alia klaru katak ba hirak ne’ebé la bele hetan apoiu tanba balu hela iha rai disputa ou rai ne’ebé mak iha problema.
“Agora edifisiu, eskola, uma lisan sira ne’e, tanba públiku, entaun APC la’o tuir dekretu lei hodi hala’o nia knaar fó apoiu ba ema ne’ebé hela iha nia uma, agora kona-ba kios sira ne’e la bele, maibe kios iha kedan uma laran ne’e bele fó apoiu, ne’ebé nu’udar tekník hein de’it, saida mak dekretu lei ne’e ko’alia,” nia esplika.
Nia afirma, Xefe suku ne’e tuir loloos ba fó hatene fali APC sira mais tenke iha evidensia, mais kuandu mai dehan de’it ne’e la bele, nune’e evidensia mak ne’e foto uma, na’in ba uma ne’e ho nia identidade.
“Konsidera la justu ne’e tenke halo deklarasaun ruma hodi ba Xefe suku asina, tanba bele mós ema ba foti dadus komunidade afetadu sira ne’e sai tiha ba fatin ruma, tanba ne’e ita la foti dadus, maibé foti sira seluk,” Anacleto afirma.
Aleinde ne’e mós APC rekoñese komunidade afetadu sira sei nafatin iha lona okos, tanba ne’e husu nafatin ba Autoridade Protesaun Sivil iha Munisípiu hodi bele haree asuntu sira ne’e.
Entretantu Materiál atu rekopera hikas konstrusaun ne’ebé hetan ajuda husi Governo mak hanesan, kalen 50, besi-oan 50, baza kuda-kuda no latasen 50, semente saka 50, inklui osan ba rekoperasaun nian $.150.00 ba transporte $.850.00, nune’e mós vítima dezastre kada uma kain hetan osan $.1.000.00.
Jornalista : Mariano Do Santos Abi
Editór : Orlando Magno
