(Kovalima) Mudansa – Eskola Ensinu Baziku Filial (EBF) 1, 2 Zulo Taz postu administrativu Zumalai Munisipiu Kovalima, hetan estragus husi erozaun, dadaun ne’e estudante sira hala’o prosesu aprendizajen iha de’it lona okos to’o ona semana ida.
Tanba ne’e Koordenadora EBF 1, 2 Zulo Taz Emilia Soares Lemos Barreto husu Ba ministériu Edukasaun atu apoiu urjente ba eskola refere nune’e bele fó fatin dignu ba estudante sira hala’o prosesu aprendizajen.
“Hau sente fatin ne’e, la seguru ba estudante sira, tanba ne’e husu ba ministériu edukasaun atu tau matan ba ami nia eskola ida ne’e, hodi fó apoiu emerjénsia tanba durante ne’e hala’o de’it prosesu aprendizajen iha de’it lona okos,” dehan Koordenadora EBF Zulo Taz Emilia ba Media Mudansa via telefone, segunda, 17/07/2023.
Emilia konta, prosesu aprendizajen iha lona okos durante semana ida ona hahú iha loron 10/07/2023, maibé estudante balu uza kapela hodi hala’o prosesu aprendizajen.
Nia relata, Hafoin akontesimentu ne’e mosu Parte Ministeriu Edukasaun iha munisípiu Kovalima tun direita halo observasaun ba eskola EBC ZULO TAZ hodi foti dadus maibé to’o agora seidauk hetan apoiu emerjénsia ruma atu estudante sira bele hala’o prosesu aprendizajen ho seguru.
“La hatene Bainhira maka parte edukasaun atu fó apoiu ba eskola EBF Zulo Taz ne’ebé hetan estragus husi erozaun ami presiza Ministeriu Edukasaun Apoiu uma dignu ida ho emerjénsia nune’e ami bele hala’o ensinu aprendizajen ho di’ak no seguru,” nia rekomenda.
Iha fatin hanesan, estudante EBF 1, 2 Bernardinu Barreto espresa ninia sentimentu tristeza tanba hala’o aprendizajen ida de’it lona okos sente la seguru.
“Hau sente triste tebes tanba ami aprende iha de’it lona okos tanba ne’e husu ba na’i ulun sira atu tau matan ba ami nia eskola ida ne’e ho urjente atu ami bele aprende iha fatin seguru,” Estudante Bernadino rekomenda.
Tuir dadus ne’ebé média mudansa asesu, Total estudante iha EBF Zulo Taz hamutuk 109 kompostu husi feto 56 mane 53 no mós profesores hamutuk na’in 8 kompostu husi Profesora na’in 5 no mós profesór na’in 3.
Jornalista : Ekipa Media Mudansa
Editór : Orlando Magno
