Sosial  

SEEAS “La Preokupa” Vitima Erozaun Iha Zulo Halerik Bee Ho Eletrisidade

banner 120x600

(Kovalima) Mudansa – Hafoin mosu erozaun iha Zulo Kanua, Suku Zulo, Postu Administrativu Zumalai, Munisípiu Kovalima, komunidade Zulo liuliu vítima sira susar tebes atu asesu bee moos no eletrisidade, tanba too agora parte relebante seidauk solusiona vitima sira nia preokupasaun kona-ba bee no eletrisidade.

Ho nune’e, Xefe suku Zulo, João Lopes Carvalho sujere ba instituisaun Eletrisidade Timor-Leste, Institutu Públiku (EDTL,I.P) ho Bee Timor-Leste, Institutu Públiku (BTL,I.P) liuliu Secretário de Estado da Eletricidade, Água e Saneamento (SEEAS), atu responsabiliza vitima sira nia prokupasaun, tanba antes nee ekipa husi instituisaun rua halo ona observasaun direita iha fatin akontesimentu.

“Komunidade afetadu hamutuk 62 nafatin kestiona eletrisidade ho bee moos, tanba até a data vítima erozaun sai refujiadu iha suku Zulo, la asesu bee moos no ahi eletrisidade tanba ne’e husu ba SEEAS liu husi BTL,I.P ho EDTL,I.P tenke iha responsabilidade,” Xefe suku Zulo, João Lopes Carvalho hato’o preokupasaun ne’e ba média Mudansa via telemovel, Sesta 14/07/2023.

Xefe suku Zulo João subliña, kestiona kona-ba eletrisidade ninian tanba komunidade afetadu simu ona rekuperasaun materiál konstrusaun, ho modernu ne’ebé presiza eletrisidade, no parte bee moos nian komunidade afetadu sira sei halerik tanba rai halai taka tiha bee matan sira ne’ebé mak durante ne’e sira konsumu.

“Ne’ebé kona-ba atu hasai komunidade afetadu sira husi lona okos ne’e, sira presiza mak Bee Moos, Eletrisidade ho Estrada buat tolu ne’e mak sira presiza hela,” nia relata.

Tuir dadus ne’ebé Media Mudansa asesu totál populasaun hamutuk 520 no mós Uma kain hamutuk 164 maibé vítima afetadu ba erozaun hamutuk uma kain 62 inklui uma lisan 44, husi hirak ne’e hotu uma kain 57 hetan ona apoiu rekuperasaun materiál konstrusaun maibé uma kain lima to’o agora seidauk hetan apoiu matéria konstrusaun.

To’o notisia nee publika, Media Mudansa seidauk halo komfirmasaun ho instituisaun relevante atu halo balansu tanba loron sabadu entaun instituisaun refere  maibe, Media mudansa sei halo komfirmasaun hodi halo balansu ba notisia nee iha loron tuir mai.

Jornalista : Mariano Do Santos Abi

Editór         : Orlando Magno

banner 325x300