(Dili) Mudansa – FOKUPERS aprezenta númeru vítima durante tinan tolu (3) hahú husi 2020-2022 vítima hamutuk nain 800 ne’ebé hetan asisténsia husi FOKUPERS maioria hetan susesu, signifika FOKUPERS nia susesu maka vítima sira nia susesu (haksolok).
Asuntu ne’e hato’o husi Diretora FOKUPERS Maria Fatima Soares bainhira hala’o serimónia Selebrasaun aniversáriu FOKUPERS nian ba dala 26 iha salaun S.João Paulo Komoro Dili.
Nia esplika, kona-ba númeru susesu sira la ko’alia maibé importante iha mudansa boot saida mak vítima sira halo iha komunidade hafoin fila husi uma mahon ba fali sira nia família.
“FOKUPERS nia susesu mak vítima sira nia susesu, ami sei haree rezultadu susesu tanba FOKUPERS nia susesu la ses husi parseiru sira nia kontribuisaun ne’ebé suporta ami to’o ohin loron,” dehan Diretora FOKUPERS Maria Fatima ba jornalista iha salaun S.João Paulo Komoro Dili, Segunda, 17/07/2023.
Maria haktuir, FOKUPERS sei haree kazu violénsia seksuál no mós kazu violénsia fíziku ne’ebé númeru boot liu tanba komete husi la’en sira inklui kazu insestu.
Nia hatutan, atu minimiza kazu ne’e la’ós FOKUPERSE nia servisu maibé bazeia ba kazu violénsia doméstika asuntu sosiál ne’ebé transversal iha ligasaun la’ós de’it FOKURSE nia misaun atu responde maibé presiza ema hotu nia esforsu.
Iha fatin hanesan, Sekretaria Estadu Igualidade Inkluzaun (SEII) Elviana Sousa de Carvalho argumenta, kazu insestu hanesan krime ida ne’ebé la bele husik akontese beibeik no husu ba vítima sira tenke ko’alia sai.
“Iha relasaun raan ne’ebé esensiativu oan feto no mane sai vítima ba kazu insestu. atu ko’alia sai krime ne’ebé sira hasoru ita hatene ita-nia lei proteje enkuantu ilegál maibé bazeia ba diskusaun ne’ebé mosu,” katak nia.
Nia haktuir durante implementasaun lei ne’ebé iha sei revizaun ba artigu ida ka rua iha kódigu prosesa penál hodi fó justisa lolos ba vítima sira, tanba agora keixa barak vítima sira la sente justisa.
“Bainhira deputadu sira hanoin iha duni revizaun ba lei parte hotu-hotu, halo advokasia halakon krime insestu, revizaun ba lei hodi kriminaliza insestu sai hanesan prioridade atu halo revizaun ba lei ne’e maibé importante vítima sira ko’alia sai, no família, autoridade lokál tenke ativu hodi bele ko’alia,”nia hakotu
Jornalista : Domingas Viana
Editór : Orlando Magno
