(Dili) Mudansa – Sekretariu Jeral Partidu Congresso Nacional de Reconstrução de Timor (CNRT) Francisco Kalbuadi Lay informa, Partidu CNRT konkorda ona atu halo koligasaun ho Partidu Demokrátiku (PD) hodi avansa ba governu da sia, maibé iha governasaun foun ida ne’e, Xanana Gusmão mak sei sai Primeiru Ministru (PM).
“Ami ohin mai reafirma katak, Partidu CNRT prontu halo koligasaun ho Partidu Demokrátiku (PD). ida ne’e ita boot sira rona ka lae durante kampaña, saida mak partidu hato’o laiha tawar, Primeiru Ministru maka Maun Bo’ot Kay Rala Xanana Gusmão,”Dehan Kalbuadi hafoin entrega karta koligasaun iha sede PD Kolmera, 05/06/2023.
Kalbuadi hatete, karta ne’ebé dadaun entrega ba Partidu Demokrátiku, asina husi Prezidente Partidu CNRT Kay Rala Xanana Gusmão ho Sekretariu Jeral Partidu CNRT, nune’e agora ba oin partidu rua ne’e sei hamutuk mak forma governu hodi serví ba povu no rai ida ne’e.
“Maibe ami la haluha mós atu kongratula ba partidu 17 ne’ebé mak ba partisipa ona Elisaun Parlamentár, ba plataforma no mós ba partidu 12 ne’ebé la hetan asentu iha parlamentu,”katak nia.
Fatin hanesan Sekretariu Jeral PD, António da Conceição “Kalohan” hatete, nia parte lori kuadru Partidu Demokratiku hato’o agradese boot ba partidu CNRT ne’ebé aseita ona pedidu koligasaun husi PD.
“Tanba ne’e ha’u hamutuk ho estrutura tomak, ami mai simu agradese partidu CNRT nia prontidaun atu simu ami nia dejezu ne’ebé mak ami hato’o iha dia 30 de maiu, ohin halo troka de nota,” dehan Kalohan.
Sekretáriu Jeral PD ne’e haktuir tan, maski Partidu rua ne’e, ida-idak la’o durante iha periode kampaña maibé ikus mai hasoru malu tanba objetivu ida de’it maka hakarak halo mudansa ba dezenvolvimentu iha rai ida ne’e.
Tanba ne’e, ohin hanesan reafirmasaun ida entre partidu rua ne’e atu hahú filafali komprimisu sira ne’ebé hala’o ona iha tinan 2017 hodi kontinua fali iha 2023 to’o 2028.
Jornalista : Julião da Silva
Editor : Orlando Magno