(Dili) Mudansa – Partidu Timor Forte (PATIFOR) hato’o parabéns ba Povu Timor-Leste ne’ebé fó ona konfiansa ba Partidu Congresso Nacional de Reconstrução de Timor (CNRT) iha Eleisaun Parlmentar tinan 2023 ho formasaun governu da sia
“Ami hato’o parabéns ba Povo Doben Timor-Leste tantu iha rai li’ur liuliu ba Partidu Vensedor CNRT liu husi Prezidente Partidu CNRT ho nia aliadu sira, movimentu, ne’ebé lori hikas ona vitória iha ELPAR 2023 ida ne’e,”dehan Prezidente Interinu PATIFOR Gregório Saldanha liuhusi konferénsia imprensa, iha Sede PATIFOR, 03/06/2023.
Gregório hatete, vitória ne’ebé CNRT hetan, ba PATIFOR, hanesan inísiu ba mudansa no progresu ba Timor-Leste nian husi tinan 2023 to’o 2028.
Nia mós hato’o agradesimentu ba Estrutura PATIFOR, husi nivel nasionál to’o baze, militante no apoiante tomak Kandidatu Partidu Timor FORTE nian ne’ebé apoia ona Partidu CNRT iha Kampaña ELPAR 2023, tuir orientasaun Konsellu Superior Nasionál-KSN PATIFOR hato’o iha dia 04/04/2023 liu ba.
“Impresaun husi PATIFOR kona ba ELPAR 2023, Vox Populi Vox Dei’, a Voz da Povo é a voz de Deus, votu povu nia, hanesan povu maromak nian, ka Suara rakyat adalah suara tuhan,”katak nia.
Nia afirma, ELPAR 2023, nu’udar festa ida ne’ebé la’o ho di’ak no demokrátiku duni, no Durante kampaña PATIFOR aprende buat barak husi Xanana no iha tempu hanesan, aprende mós husi Maun boot sira seluk.
Hanesan maun Ramos Horta, maun Rogério Lobato, maun Lu-Olo, maun Mari, Alkatiri, Maun TMR, Maun Lere, no maun sira seluk kona-ba sira nia estilu lideransa, sira nia vizaun no misaun ba dezenvolvimentu nasionál, no oinsá lori Timor Leste ba oin.
“Espera katak sira hotu di’ak de’it, atu nune’e, ita nu’udar jerasaun foun, bele aprende nafatin husi sira,”afirma nia.
Nia esplika, Partidu Timor forte mós hakarak deklara katak depois rona tiha rezultadu Provijóriu ELPAR 2023, liu husi anúnsiu ofisiál ne’ebé sei fó sai husi Tribunal Rekursu iha loron tuir mai, Nu’udar Prezidente Interinu PATIFOR, liu husi desizaun KSN nian, fó orientasaun no apelu ba estrutura PATIFOR nivel nasionál to’o baze, militantes no apoiante sira, atu mai hamutuk fali iha Knua PATIFOR hodi serbisu di’ak liu tan.
“Lori kandidatu partidu polítiku ne’e sai partidu ida legál hanesan mós partidu polítiku sira seluk, nune’e bele serví lisuk povu doben Timor Leste. Orientasaun no atividades PATIFOR ba oin sei komunika liu husi kanál Estrutura PATIFOR nian,”nia salienta.
Iha ne’e, PATIFOR mós hakarak fó agradese nafatin ema hotu nia esforsu hodi lori Vitória ba Partidu CNRT, husi Vitória ne’e signifika inísiu ba Mudansa no Progresu ho moto “Adeus Konflitu no Empase Politika, no Bem Vindu ba Dezenvolvimentu”.
Jornalista : Julião da Silva
Editór : Orlando Magno
